İrəvanda "4 iyul" ssenarisi: Karapetyanın gizli planı Paşinyanı devirə bilərmi? – ÖZƏL

Erməni mediasının məlumatına görə, "Güclü Ermənistan" hərəkatının lideri Samvel Karapetyan bildirib ki, Paşinyan hökumətinə qarşı mübarizə aparmaq üçün müxtəlif siyasi qüvvələr və nüfuzlu şəxslər onların ətrafında birləşir. O, Konstitusiya Məhkəməsinin qərarını gözlədiklərini, Paşinyanın hakimiyyətdən uzaqlaşdırılması üçün gizli fəaliyyət planlarının olduğunu və bunu vaxtı gələndə açıqlayacaqlarını deyib.

"Bu bəyanatların kontekstini indiki vəziyyətlə birləşdirəndə mənzərə aydınlaşır. Faktiki fon budur ki, 7 iyun parlament seçkilərində Paşinyanın "Mülki Müqavilə"si 49.8%, Karapetyanın "Güclü Ermənistan"ı 23.3%, Köçəryanın "Hayastan" bloku 9.9% səs toplayıb. Karapetyan özü 2025-ci ilin iyunundan hakimiyyəti ələ keçirməyə çağırış ittihamı ilə ev dustaqlığındadır. Seçkidən sonra "Güclü Ermənistan", "Hayastan" və "Çiçəklənən Ermənistan" daxil yeddi qüvvə nəticələri Konstitusiya Məhkəməsində mübahisələndirib, məhkəmənin 4 iyula qədər qərar verməsi gözlənilir".

Bu fikirləri Olaylar.az-a açıqlamasında siyasi şərhçi Əfsanə İbrahimova deyib. Siyasi şərhçi bildirib ki, bu bəyanatların təsiri baxımından bir neçə cəhət mövcuddur. Müxalifətin konsolidasiyası real, amma kövrəkdir. Karapetyan, Köçəryan və Tsarukyan koordinasiya şurası yaratmaq barədə danışıqlar aparsa da, mənbələr bildirir ki, konkret "yol xəritəsi" hələ təqdim olunmayıb, bu, birləşmənin daha çox rəqabətçi mövqe nümayişi olduğunu, əməli ssenarinin isə hələ formalaşmadığını göstərir. Digər tərəfdən "Gizli plan" ritorikası ikili funksiya daşıyır, hansı ki, həm tərəfdarları mobilizasiya etmək, həm də hakimiyyətə psixoloji təzyiq vasitəsidir, amma konkret məzmun açıqlanmadığı üçün ciddiliyini müstəqil qiymətləndirmək çətindir.
Digər tərəfdən Konstitusiya Məhkəməsinin qərarı əsas dönüş nöqtəsidir. Məhkəmə ya CEC-in nəticələrini təsdiqləyəcək, ya bəzi məntəqələrdə təkrar səsvermə təyin edəcək, ya da bütün nəticələri etibarsız sayacaq. Bu qərar küçə mübarizəsinin başlayıb-başlamayacağını, yaxud prosesin institusional çərçivədə qalacağını müəyyənləşdirəcək.

Ekspertin sözlərinə görə, xarici amil də olduqca güclüdür. Reuters-in araşdırmasına görə, Rusiya Karapetyanı dəstəkləyir və seçkiqabağı təsir əməliyyatları aparıb; bu, daxili siyasi mübarizəni geosiyasi rəqabətin (Rusiya-Qərb) bir hissəsinə çevirir.
Nəticə etibarilə onu demək olar ki, bu bəyanatlar qısamüddətli sabitliyə real risk yaradır, xüsusən Konstitusiya Məhkəməsinin qərarından sonra küçə aksiyaları ehtimalı var. Amma Paşinyanın parlamentdə hələ də əksəriyyəti (49.8%) saxlaması və "yeni seçki/2-ci tur" tələbinin hüquqi əsaslarının məhdud olması göstərir ki, sürətli hakimiyyət dəyişikliyi ssenarisi hazırkı mərhələdə çox da güclü görünmür, daha çox uzunmüddətli siyasi gərginlik və polyarizasiyanın davam etməsi gözlənilir.

Səidə Ramazanova