"Deputatlığa namizədin toxunulmazlığı ilə bağlı sualları Baş Prokurorluğa ünvanlayın" – ÖZƏL

Olaylar.az xəbər verir ki, Ermənistan Mərkəzi Seçki Komissiyasının (MSK) sədri Vaqan Ovakimyan parlamentdə jurnalistlərə açıqlamasında bildirib ki, prokurorluğun MSK-nın razılığı olmadan deputatlığa namizəd Qaqik Tsarukyana qarşı ittiham irəli sürməsi ilə bağlı suallar birbaşa Baş Prokurorluğa ünvanlanmalıdır. 

Ovakimyan deputatlığa namizəd statusunun mandatlar paylanana qədər qüvvədə qaldığını və Seçki Məcəlləsinin namizədlərə toxunulmazlıq hüququ verdiyini xatırladıb. Lakin o, bu toxunulmazlığın yalnız namizəd statusu aldıqdan sonra başlanan cinayət təqibinə aid olduğunu, sözügedən işin isə daha əvvəl açılmış bir cinayət işi ilə bağlı ola biləcəyini qeyd edib. MSK sədri qurumun digər dövlət orqanlarının fəaliyyətini şərh etmək səlahiyyətinin olmadığını vurğulayaraq, əgər hər hansı bir tərəf prokurorluğun addımını qanunsuz hesab edirsə, bu qərardan məhkəməyə şikayət edə biləcəyini əlavə edib.