Rusiya elitası müharibənin dalana dirəndiyini düşünür, Putin isə şərtləri ilə sülh istəyir – ÖZƏL

Cəbhədə uğurların olmaması, artan itkilər, Ukrayna dronlarının effektiv hücumları və iqtisadi böhran fonunda Rusiya rəhbərliyinin bir çox nümayəndəsi Ukraynaya qarşı aparılan müharibəyə daha ayıq nəzərlərlə baxmağa başlayıb. 

Olaylar.az xəbər verir ki, "Bloomberg" agentliyinin məlumatlı mənbələrə istinadən yaydığı xəbərə görə, Kremldəki bəzi yüksəkvəzifəli rəsmilər münaqişənin dalana dirəndiyini və ondan çıxış yolunun görünmədiyini hesab edirlər. Buna baxmayaraq, Rusiya Prezidenti Vladimir Putin müharibəni davam etdirmək niyyətindədir və onu ilin sonuna kimi öz şərtləri ilə, yəni Donbas üzərində tam nəzarəti təmin etməklə və Avropa ilə Moskvanın ərazi qazanclarını qanuniləşdirən geniş təhlükəsizlik sazişi imzalamaqla başa vurmaq istəyir.

Avropalı diplomatlar Kremldəki ab-havanı tutqun kimi qiymətləndirirlər, çünki döyüş meydanındakı pat vəziyyəti ilə yanaşı, Ukrayna dronları Rusiyanın neft sənayesinə ciddi zərbələr vurur və müharibəni artıq Moskvaya daşıyıb. Mayın 17-nə keçən gecə Moskva regionuna təxminən 600 dronla təşkil edilən ən böyük hücum enerji obyektlərini, hərbi sənaye müəssisəsini və "Şeremetyevo" hava limanını hədəf alıb. PUA hücumlarından ehtiyat edən Putinin regionlara səfərlərini dayandırdığı və artıq 196 gündür yalnız hava hücumundan müdafiə sistemləri ilə ən yaxşı qorunan Moskva, Moskva vilayəti və Sankt-Peterburqda ictimaiyyət qarşısına çıxdığı bildirilir. "Financial Times" isə qeyd edir ki, hərbi rəhbərlik Putini Donbasın payıza qədər işğal oluna biləcəyinə inandırsa da, ABŞ Müdafiə Nazirliyinin Kəşfiyyat İdarəsinin məlumatına görə, yanvar ayında Rusiya ordusu üçün "Starlink" peyk internet terminalının söndürülməsindən sonra Ukrayna Silahlı Qüvvələri təxminən 400 kvadrat kilometr ərazini azad edib.

Ukrayna ordusu şəxsi heyət çatışmazlığına baxmayaraq, artıq 2025-ci ildəki kimi dərin müdafiədə oturmur, piyada və yerüstü dronların köməyi ilə əks-hücumlar təşkil edir. Ukraynanın müdafiə naziri Mixail Fedorov ölkəsinin təşəbbüsü tədricən geri qaytardığını və orduda maaşların artırılması, yeni rekrutların cəlb edilməsi və PUA-ların tətbiqinin genişləndirilməsi vasitəsilə islahatlar hazırladığını bildirib. Hətta Rusiyanın ən aqressiv hərbi blogerləri belə artıq yeni səfərbərlik çağırışları etmirlər; onlar anlayırlar ki, Ukrayna dronlarının cəbhə xəttinə ciddi nəzarəti fonunda kütləvi qoşun axını cəbhəni yarmağa yox, sadəcə daha böyük itkilərə səbəb olacaq. İki nəfərlik qruplarla Ukrayna müdafiəsinə sızmaq taktikası da PUA-ların hər yerdə olması səbəbindən artıq səmərəsini itirib və rus əsgərləri arasında 80-90% itki ilə nəticələnir.