İlham Əliyev yeni dünya düzənindəki mürəkkəb prosesləri Azərbaycan üçün fürsətlərə çevirməyə bacarıb
"Azərbaycan Prezidenti cənab İlham Əliyev davamlı olaraq diplomatik uğurlara və qələbələrə imza atmaqdadır. Cənab Prezidentin yürütdüyü çevik, uzaqgörən siyasəti nəticəsində Azərbaycan dünyanın güclü, nüfuzlu ölkələrindən biri olmaqla beynəlxalq aləmdə ciddi regional və qlobal oyunçu rolunu oynayan dövlət kimi qəbul edilir". Bunu "Olaylar"a açıqlamasında Milli Məclisin deputatı Məlahət İbrahimqızı deyib. Onun sözlərinə görə, son zamanlarda istər cənab Prezidentin xarici səfərləri, istər ölkəmizə səfərlər, istərsə də ölkəmizdə keçirilən mötəbər beynəlxalq tədbirlər Azərbaycanın beynəlxalq münasibətlər sistemində oynadığı əhəmiyyətli roldan xəbər verir: "Yürüdülən siyasət nəticəsində Azərbaycan dünyada Avrasiya coğrafiyasında nəinki sülhün, sabitliyin və əməkdaşlıq formatlarının yaranmasında, o cümlədən bu coğrafiyada təhlükəsizliyin də təmin olunması istiqamətində uğurlu dialoq platforması yaradan ölkə kimi qəbul olunur".
Deputat əlavə edib ki, cənab Prezidentin yürütdüyü çevik və çoxvektorlu uğurlu diplomatiya nəticəsində Azərbaycanın beynəlxalq aləmdə geosiyasi və geoiqtisadi mövqeyi möhkəmlənməklə yanaşı "orta güc" dövlət kimi qəbul edilməkdədir: "Dünya ölkələri cənab Prezidentin yürütdüyü siyasət nəticəsində Azərbaycanın gücü və mövqeyi ilə hesablaşmalı olurlar. Onun dünyada güclü bir siyasi lider olduğunu qəbul edirlər. Biz bunun bu günlərdə Albaniyada "Avropa Siyasi Birliyi"nin 6-cı Zirvə toplantısında aydın şəkildə şahidi olduq. Azərbaycana qarşı "soyuq müharibə" aparan Fransa prezidenti Emmanuel Makronun Azərbaycan liderinə yarınmaq kimi görünən jestləri, Avropa Komissiyasının Prezidenti Ursula fon der Leyen və Avropa Parlamentinin rəhbəri Roberta Metsolanın Prezident İlham Əliyevlə görüşmək xahişi, eləcə də digər dövlət rəhbərləri səviyyəsində Azərbaycan liderinə olan münasibət deyilənlərin təsdiqidir".
Deputat bildirib ki, Prezident İlham Əliyev yeni dünya düzənindəki mövcud mürəkkəb geosiyasi prosesləri Azərbaycan üçün fürsətlərə çevirməyə bacarıb: "Cənab Prezident "Avropa Siyasi Birliyi"nin hələ 2022-ci ilin oktyabrında keçirilən Zirvə toplantısında aktiv iştirakə zamanı ciddi diplomatik qələbə edə bildi. Belə ki, Ermənistanın havadarlaırnın iştirakı və birgə qəbul etdiyi bəyanatla Ermənistan rəsmi şəkildə Azərbaycanın ərazi bütövlüyü tanımalı oldu. Hansı ki, bu diplomatik qələbəni Cənubi Qafqazda marağı olan digər ölkələr tərəfindən heç də müsbət qarşılamadıqlarını açıq şəkildə dilə gətirdilər. 2022-ci ildə qəbul edilən bu diplomatik uğur 2023-cü ilin sentyabrında Azərbaycanın tam suverenliyinin təmin olunması ilə nəticələndi.
Cənab Prezidentin yürütdüyü uğurlu diplomatiyanın davam etməsi bu gün Azərbaycanın beynəlxalq aləm tərəfindən qəbul edilən "orta güc" ölkə olması ilə nəticələnib.
Azərbaycanın "orta güc" olması Prezident İlham Əliyevin Tiranada Avropa İttifaqı Şurasının Prezidenti Antonio Koşta və Avropa Komissiyasının Prezidenti Ursula Fon der Lyayenlə görüşünda müzakirə olunan məsələlər aydın şəkildə sübut edir. Görüşdə Aİ liderləri tərəfindən Azərbaycanın Avropa İttifaqının vacib və etibarlı tərəfdaşı olması, Avropanın enerji təhlükəsizliyinin təmin olunmasında, eyni zamanda Mərkəzi Asiya regionu ilə əlaqələri və Orta Dəhlizdə aparıcı rol oynaması, Avrasiya coğrafiyasında sülhün və sabitliyin təmin olunmasında müxtəlif tərəflər arasında dialoqun aparılması üçün ciddi platforma rolu oynamasındakı əhəmiyyətli rolu qeyd edildi. Bu isə Avropa İttifaqının bəzi ölkələri tərəfindən Cənubi Qafqazda ayırıcı xətt yürütmək niyyətində olanların Azərbaycan tərəfindən uğurlu əkshəmlə nəticəsində iflasa uğradılmasının sübutu idi. Cənab Prezident bununla da sübut etdi ki, o bölgəmizdə sabitliyi pozub gərginliyi yaradan bütün çirkin planları uğursuzluğa düçar etməyə və yekunda Azərbaycanla hesablaşamağa məcbur etmək gücünə qadirdir qadirdir. Avropa liderləri də bunu gördüyündən Azərbaycanla hesablaşıb əməkdaşlıq etmək yolunu seçməkdən başqa yolu yoxdur".