Əli Əkbər Əhmədianın Bakıya səfərinin pərdəarxası məqamları

44 günlük Vətən müharibəsində məğlub olmuş Ermənistan sülh müqaviləsi imzalamaq əvəzinə sürətlə silahlanma yolu tutub. Sirr deyil ki, bu işdə ermənilərin xarici havadarları daha çox canfəşanlıq edirlər. Təəssüf yaradan məqam ondan ibarətdir ki, Ermənistanın silahlandırılmasında bəzi region dövlətlər xüsusi fəallıq göstərirlər. Bu istiqamətdə İran İslam Respublikasının atdığı addımlar diqqət çəkir. Ermənistanı silahlandırmaqla Cənubi Qafqazda sabitliyi pozmağa çalışan dairələr qarşılarında qalib dövlət olan Azərbaycanı görməlidirlər.  Prezident İlham Əliyev yerli telekanallara müsahibəsində də Ermənistanın sürətlə silahlanması məsələsinə toxunub. Bildirib ki,  Ermənistanın silahlanması, sadəcə olaraq, yeni gərginliyə gətirib çıxaracaq: "Biz bunu istəmirik. Biz sülh istəyirik. Biz istəyirik ki, artıq müharibə səhifəsi bağlansın. Ancaq görürük ki, Ermənistanın həm özü, həm onun yeni havadarları bunu istəmirlər. Onlar revanşist fikirlərlə yaşayırlar və Ermənistan faktiki olaraq bölgə üçün bir təhdid mənbəyidir". Dövlət başçısı hələ 44 günlük Vətən müharibəsində İranın Azərbaycan ərazisində qanunsuz işlərlə məşğul olduğunu xatırladıb: "Sadəcə olaraq, bəzi məqamları xatırlatmaq istəyirəm. İkinci Qarabağ müharibəsi başa çatandan, artıq biz Laçın yoluna vizual müşahidə əldə edəndən sonra görməyə başladıq ki, İrandan gələn yanacaqdaşıyan yük maşınları müntəzəm olaraq Qarabağa Ermənistandan səfərlər edirlər. Mən köməkçimə göstəriş verdim və o, İranın Azərbaycandakı ovaxtkı səfiri ilə telefonla danışıb və deyib ki, bunu dayandırın. Biz bunu ictimailəşdirmək istəmirik, biz xahiş edirik, bunu dayandırın. Bu, yaxşı deyil, biz bunu görürük, bu, bizim ərazidir. Siz burada qanunsuz işlərlə məşğulsunuz. Əfsuslar olsun ki, bundan sonra bu, dayanmadı və daha da artdı. Ondan sonra ikinci addım olaraq biz İran səfirini Xarici İşlər Nazirliyinə dəvət etdik və ona etiraz notası verildi və bunu ictimailəşdirdik. Ondan sonra da həm gülməli, həm də ağlamalı hadisələr baş verdi. Saxta erməni maşın nömrələrini İran yanacaqdaşıyan yük maşınlarının üzərinə yapışdırmaqla sanki bu, Ermənistan maşınlarıdır. Amma onların üzərində farsca yazılar da var idi. Bu, bizi çox təəccübləndirdi. Özü də biz araşdırmağa başladıq. Gördük ki, eyni nömrə bir neçə maşına yapışdırılır, yəni, nömrə eyni, maşınlar fərqli idi. Yəni, bu saxtakarlığı da o qədər səliqəsiz etmişdilər ki, adam, vallah, söz tapa bilmir. Ondan sonra biz artıq bir maşını saxladıq, sürücülər saxlanıldı və biz gördük ki, onların yol sənədlərində yazılıb ki, Stepanakert, Ermənistan. Yəni, bu, açıq bizim ərazi bütövlüyümüzə, suverenliyimizə hörmətsizlik idi.
Ondan sonra bizə qarşı o məlum hədə-qorxu addımları, təlimlər, bəyanatlar, hədələr başlamışdı. Biz də adekvat addımlar atdıq. Bizim sərhədimizdə əgər hər hansı bir təlim, hərbi təlim keçirilirsə, biz də Azərbaycan-İran sərhədinin bu tərəfində eynisini etdik. Yəni, göstərdik ki, biz heç kimdən qorxmuruq və haqlı olan tərəf bizik. Bu, eyni zamanda, mətbuatda həmin o təhqir kampaniyası ilə müşayiət olunurdu. Çünki bu, görünür, bəzi hakim dairələrin belə iş üslubudur. Əslində, təhqir gücsüzlüyün rəmzidir. Sən əgər nəyəsə çata bilmirsənsə, - yəni, mən ədəbsiz olan insanları nəzərdə tuturam, - təhqirə keçirlər. Yəni, təhqir edən, əslində, özünü təhqir edir".
Milli Məclisin deputatı Sahib Alıyev qeyd edib ki,  Azərbaycan Prezidenti cənab  İlham Əliyevin  yanvarın 7-də yerli televiziya kanallarına  verdiyi və Ermənistana sərt  xəbərdarlıq edilən, onun havadarlarından  birinin qarşısında açıq tələb qoyulan intervünün böyük  reaksiya doğuracağı öncədən  bəlli idi: "Mən İranın  Milli Təhlükəsizlik üzrə Ali Şurasının katibi Əli Əkbər Əhmədianın Bakıya səfərini və ardınca da İrəvana getməsini məhz həmən reaksiyalardan biri kimi qiymətləndirirəm.  Ermənistanın işğal dövründə "mədəni və dini abidələrimizi dağıtmasının, məscidlərimizi təhqirə məruz qoymasının, ibadət ocaqlarında donuz və inək saxlanmasının"  bu haqda çox yaxşı bilgiləri olan İran rəsmisinin diqqətinə niyə çatdırıldığı yəqin aydındır.  Əli Əkbər Əhmədianın "regionda Azərbaycan ilə İranın mədəni, tarixi, dini, o cümlədən sivilizasiya əlaqələrinin bənzərsizliyi və  bu cür qədim əlaqələri olan iki ölkəni tapmağın mümkünsuzlüyü" haqda fikirlərinin qarşılığında  cənab  İlham Əliyevin "xalqlarımızın çox sıx tellərlə bir-birinə bağlılğı"ndan söz salması  təbii ki, səbəbsiz deyil.  Yəni  biz  Azərbaycan torpaqları işğal altında olanda da, 44 günlük savaş zamanı da, ondan sonrakı dövrdə də rəsmi Tehranın necə bir siyasət yeritdiyini unutmamışıq. Bununla yanaşı İranla qarşılıqlı faydaya dayanan əlaqələrin genişlənməsində maraqlıyıq, ilk növbədə də ona görə ki,  orada yaşayanların böyük bir hissəsini təşkil edən soydaşlarımızla  cənab Prezidentin təbirincə desək, çox sıx tellərlə bağlıyıq.  Azərbaycanın İrandan istədiyi biz ona yanaşmada necə davranırıqsa, qarşı tərəfin də o cür hərəkət etməsidir.  Edəcəksə,  xeyli xub, etməyəcəksə, rəsmi Tehran bundan kimin daha çox itirəcəyinin indi heç vaxt olmadığı qədər fərqindədir.   
Fikrimcə, təkcə İranın  Milli Təhlükəsizlik üzrə  Ali Şurasının katibinin deyil,  Avropa Birliyinin  Cənubi Qafqaz üzrə özəl təmsilçisi  Maqdalena Qrononun səfərini də cənab Prezidentin sözü gedən intervüsünə operativ reaksiya saymaq olar.  Dövlət başçımızın Avropa Birliyinin təmsilçisinə Azərbaycanla  Ermənistan arasında danışıqlar prosesinin ikitərəfli müstəvidə aparıldığını xatırlatmağa  niyə ehtiyac duyulduğunun  cavabı  onun  yerli telekanallara  verdiyi intevüdə 5 aprel  Brüssel görüşü ilə bağlı  dediklərindədir.  Ötən il aprelin 5-də ABŞ və Avropa Birliyinin Ermənistana həm də hərbi xarakterli hərtərəfli dəstəyi haqda razılığa gəlinən o görüşdən sonra ABŞ də, Avropa Birliyi də  öz vasitəçiliklərini Makroncasına bada verdilər.  Çox ehtimal ki, Brüsselin vasitəçiliklə bağlı növbəti təşəbbüsünün qarşılığında danışılqaırn ikitərəfli frmatda aparıldığı xatırladıldı. Mən belə düşnürəm ki,  bu görüşlərin ardından Türkiyə Prezidenti cənab Ərdoğanın dövlət başçımıza dünənki telefon zəngi də bir növ həm haqqında söz gedən intervüyə, həm də intervüyə verilən reaksiyalara reaksiya  xarakteri  daşıyırdı. Hər iki Prezidentin  əməkdaşlığımızın  bütün sahələrdə bundan sonra "Bir millət, iki dövlət" prinsipi üzrə davam etdiriləcəyini vurğulamaları o deməkdir ki, yanvarın 7-də cənab İlham Əliyevin Zəngəzur dəhlizi ilə bağlı açıqlamasına da, Ermənistanla havadarlarına  xəbərdarlığına da, İran rəhbərliyi qarşısında qoyulan tələbinə də iki dövlətin bir fikri kimi yanaşılmalıdır".

Alim Hüseynli