Anar Məmmədov: “Azərbaycan xalqı olaraq tarixi qələbəni tezliklə qeyd edəcəyik”
Azərbaycan Ordusunun erməni təxribatına qarşı həyata keçirdiyi əks hücum və əldə edilən uğurlar uşaqdan böyüyə qədər hər bir Azərbaycan vətəndaşını sevindirir, qürurlandırır
Azərbaycan Ordusunun erməni təxribatına qarşı həyata keçirdiyi əks hücum və əldə edilən uğurlar uşaqdan böyüyə qədər hər bir Azərbaycan vətəndaşını sevindirir, qürurlandırır. Bu gün Qarabağda işğal altında olan torpaqlarımız uğrunda gərgin döyüşlər getdiyi bir ərəfədə Azərbaycan cəmiyyətinin öz Prezidenti, Ali Baş Komandanı ətrafında sıx birləşməsi qələbə əzmini daha da artırır və bizi işğal altında olan torpaqlara daha tez yazınlaşdırır. Heç şübhəsiz ki, bu nailiyyət, bu uğurun arxasında isə güclü dövlət və güclü ordu dayanır.
Milli Məclisin deputatı Anar Məmmədov da deyir ki, güclü dövlətin təməl prinsiplərindən biri qüdrətli ordunun mövcudluğudur. Hər bir xalqı dünyada tanıdan, aparıcı söz sahibinə çevirən amillərdən biri də onun silahlı qüvvələridir.Onun sözlərinə görə, bu gün Azərbaycan ordusu Ali Baş Komandan, ölkə Prezidenti cənab İlham Əliyevin rəhbərliyi ilə üzərinə düşən vəzifəni layiqincə yerinə yetirməyə qadir olduğunu nümayiş etdirir: "Düşmənin təxribatlarının qarşısını layiqli cavab tədbirləri ilə alan ordumuz hansı imkanlara malik olduğunu bir daha işğalçı dövlətə göstərir".
Deputatın qənaətincə, torpaqlarımızın bir hissəsinin azad olunması, yüksəkliklərin ələ keçirilməsi, düşmənin hərbi obyektlərinin məhv edilməsi onu göstərdi ki, Vətənimizin hər qarışı uğrunda can verməyə hazırıq: "Yetər ki, Azərbaycanın ərazi bütövlüyü təmin olunsun. Azərbaycan Ordusu düşmənə vurduğu son zərbələri ilə ermənilərə nəinki dərs verdi, həm də sübut etdi ki, onların özləri barədə yaratdıqları mif sabun köpüyü imiş. Azərbaycan əsgəri Azərbaycan xalqının ondan gözlədiyi nəticəni əldə etmək üçün artıq neçə gündür işğalçını ram etməkdə, onun Azərbaycan xalqına qarşı indiyə qədər sərgilədiyi münasibətinə son qoymaqdadır. Əsgərlərimiz əks hücum əməliyyatları ilə qısa bir müddətdə xalqımıza sevincli anlar yaşatdı. Elə ilk anlardan etibarən yeddi kəndin işğaldan azad edilməsi, iki yüksəkliyin nəzarətinin ələ keçirilməsi, daha sonra isə Cəbrayıl şəhəri və onun bir sıra kəndlərinin, strateji əhəmiyyət kəsb edən Tərtərin Suqovuşan və Talış kəndlərinin, Füzuli rayonun isə bir neçə kəndinin azad olunması çox böyük hərbi uğurdur".
Anar Məmmədov bildirib ki, Azərbaycanının ərazı bütövlüyü uğrunda vuruşanlar, canını fəda edənlər heç vaxt unudulmur, onlara və ailələrinə hər zaman həssaslıqla yanaşılır: "Dövlətimizin başçısı Azərbaycan bayrağının torpaqlarımızın hər qarışında dalğalanması üçün lazım gələn bütün addımları atır, ölkəmizin iqtisadi və hərbi qüdrətini, beynəlxalq nüfuzunu gücləndirməkdən ötrü böyük inam və qətiyyətlə çalışır, yurdumuzun işğaldan tam azad edilməsi üçün böyük cəsarət və əzm göstərir. Azərbaycan vətəndaşları da öz dövlətinə və Prezidentinə inanır, ona güvənir, Azərbaycan dövlətinin və prezidentinin dəstəyini, gücünü hiss edir və bundan qürur duyur. Bu gün maddi-texniki bazası ardıcıl olaraq möhkəmləndirilən Azərbaycan ordusu işğal altında olan doğma torpaqlarımızın düşmən əsarətindən azad olunacağı günü hər gün daha da yaxınlaşdırır. Lakin əfsuslar olsun ki, ordumuzun əks-hücumlara başladığı və şiddətli döyüşlərin getdiyi ilk gündən bəri Ermənistan tərəfi yenə də öz çirkin xislətini göstərərək mülki əhalini hədəfə alır. İşğalçı ölkənin silahlı qüvvələrinin mülki infrastruktur obyektlərini atəşə tutması nəticəsində 306 yaşayış evinə, həmçinin, 56 mülki obyektə külli miqdarda ziyan vurulmuş, eləcə də, 24 nəfər dinc sakin həlak olmuş, 121 sakin yaralanmışdır. Bununla da Ermənistan tərəfi ənənəvi şəkildə yenə də belə təxribatlara əl ataraq cəbhədəki məğlubiyyətlərini mülki əhalidən qisas almaqla unutmağa çalışırlar. Qürurverici hal isə odur ki, cəbhə zonasında yerləşən kənd və şəhərlərdə yerli əhali öz evlərini əsla tərk etmir. Onların hər biri öz dövlətlərinə və əsgərlərinə güvənir. Xalqımızın mətinliyi, dözümlüyü və Azərbaycan əsgərinin döyüş ruhu Azərbaycan gənci üçün də bir nümunədir. Erməni ordusunda fərarilik, döyüş bölgəsindən qaçmaq halları baş alıb getdiyi halda Azərbaycan qadını öz oğlunu sevinc göz yaşları ilə cəbhəyə yola salır".
Deputat qeyd edib ki, qazandığımız qələbələr, əldə etdiyimiz yüksəkliklər, hərbi sirr kimi olsa da qarşıda əldə edəcəyimiz uğurların açarı kimi də hesab edilir: "Haqq ilə peşəkarlıq birləşəndə qələbə qaçılmaz olur. Haqq, tarixi həqiqət, beynəlxalq hüquq Azərbaycanın tərəfindədir. Ümid edirik ki, Azərbaycan xalqı olaraq tarixi qələbəni tezliklə qeyd edəcəyik. Azərbaycanın qələbə paradını tezliklə Qarabağda keçirəcəyik".
Süleyman
Olaylar.az