"Prezidentin bundan məlumatı varsa, deməli, biz onların vəzifədən alınmasının şahidi olacağıq" — Deputat
"Prezidentin bundan məlumatı varsa, deməli, biz onların vəzifədən alınmasının şahidi olacağıq" — Deputat
"Azərbaycanın hüquq-mühafizə orqanları, prokurorluq, xüsusi xidmət orqanları Cənab Prezident İlham Əliyevin müşavirədə söylədiyi kimi ölkədə həyata keçirilən islahatlara mane olan, ona kölgə salan, intriqalarla məşğul olan məmurları aşkar etməli, onların kimliyini açıqlayaraq ifşa etməlidir".
Bu fikri "Ölkə.Az"a açıqlamasında millət vəkili, Milli Məclisin Səhiyyə komitəsinin sədr müavini Musa Quliyev deyib.
Onun sözlərinə görə, oktyabrın 15-də ölkə başçısının yanında keçirilən müşavirə Azərbaycandakı sosial-iqtisadi vəziyyətlə bağlı 9 ayın yekunlarına həsr olunmuşdu. "Müşavirədə qeyd olunduğu kimi, bu müddət ərzində ölkə iqtisadiyyatı inkişaf edib və qarşıya qoyulan hədəflərə nail olunub. Bundan əlavə olaraq müşavirdə qarşıya qoyulan hədəflər və proqramlar barədə fikirlər səsləndi. Bütövlükdə 2019-cu il Azərbaycan iqtisadiyyatı üçün uğurlu il olub. ÜDM-də 3 faiz artım var. İl ərzində daha çox artım qeyri-neft sektorunun kənd təsərrüfatı və sənaye sahəsində qeydə alınıb. Bu, bir daha göstərir ki, Azərbaycan iqtisadiyyatındakı şaxələnmə iqtisadiyyatın inkişafına öz müsbət təsirini göstərib. Ölkə başçısının dediyi kimi, həyata keçirilən islahatlar nəticəsində gəlirlər artıb. Əldə edilən gəlirlər isə ölkə vətəndaşının sosial müdafiəsinin gücləndirilməsinə və sosial rifah halının yaxşılaşdırılmasına yönəldilibdir. Ölkə başçısının 2019-cu ilin əvvəlində sosial sahədə imzaladığı sərəncamlar əsasında pensiyalar təqribən iki dəfə, müavinətlər, minimum əməkhaqqılar xeyli artırılıb. Bu artımlar ölkə əhalisinin yaşam tərzinə müsbət təsir göstərib"- M.Quliyev deyib.
Ölkə başçısının kadr islahatları ilə bağlı səsləndirdiyi fikirlərə mövqeyini açıqlayan millət vəkili deyib ki, uğurların əldə olunmasında kadrların müstəsna xidməti var: "İslahatların uğurla davam etməsi uğurlu və peşəkar kadrlardan aslıdır".
M. Quliyev onu da əlavə edib ki, Cənab Prezident müşavirədə bir daha Baş nazirə kadr islahatların davam etdirməsini, gənc bacarıqlı, savadlı kadrların vəzifələrə irəli çəkilməsini tələb kimi qoydu.
Ölkə başçısının bəzi məmurların həyata keçirilən islahatlara əngəl törətməsi, intriqa törətməsi, islahatları gözdən salınması ilə bağlı fikirlərinə gəldikdə, deputat bundan təəssüfləndiyini bildirib. "Çox təəssüf ki, belə adamlar da var. Əgər Prezident deyibsə, deməli, məsələ ciddi xarakter daşıyır. Belə insanlara ən azından Prezidentin söylədiyi kimi bizım sıralarımızda yer yoxdur. Biz belə insanlarla yolumuzu davam etdirə bilmərik. Amma bu insanlar konkret kimlər olması barədə məndə hər hansı məlumat yoxdur. Prezidentin bundan məlumatı varsa, deməli, biz onların vəzifədən alınmasının şahidi olacağıq. Heç şübhəsiz ki, yeniliyi hər kəs qəbul edə bilmir. Bəzən uğurlu islahatlar uğursuz kadrlar tərəfindən məmuniyyətlə qarşılanmır. Ona görə də mane olurlar.
Əsas məsələ ondan ibatərdir ki, bununla bağlı olaraq cənab Prezidentin siyasi iradəsi ortadadır, xalq islahatları dəstəkləyir. Xalq bu islahatlardan məmnundur. Yəqin ki, qısa müddətdə bu insanlardan xilas olacağıq"- M. Quliyev deyib.
Vergidən yayınma, rüşvət, korrupsiya haqqında səsləndirilən fikirlərə gəldikdə, M.Quliyev deyib ki, vergidən yayınma çox ciddi məsələdir: "Prezident sahibkarlara birbaşa öz tövsiyyə və tapşırıqlarını verdi. Hökumət sahibkarların inkişafına hər zaman dəstək verir. Bundan sonra da yardım edəcək. Sahibkarlar da gərək vicdanlı davranmalı, dövlətin vergisini vaxtı-vaxtında ödəsinlər. Dövlətin büdcəsi ən çox vergidən formalaşır. Çünki formalaşn büdcə əsasında biz sosial siyasətimizi formalaşdırırıq. Həssas təbəqənin vəziyyətini yaxşılaşdırırq.
Korrupsiya və rüşvətxorluqla mübarizə gedir və Prezidentin müşavirədəki çıxışından sonra bu sahədə mübarizə daha da gücləndiriləcək.
Hesab edirəm ki, müşavirədə Prezident doğru söylədi ki, ictimaiyyət də bu məsələdə aktiv olmalıdır".
Millət vəkili eyni zamanda mediada məmurların və sabiq məmurların islahatlara mane olması ilə bağlı gedən yazıları da təqdir etmədiyini bildirib. "Mətbuat oqranları da buna diqqət yetirməlidir. Vətəndaş məsuliyyətini hiss etməlidir. Belə insanlar qarşı mübarizə aparmalıdır. Bu eyni zamanda Mətbuat Şurasının məsuliyyətini artıran məsələdir. Amma o məmurları, intriqa aparan məmurların kimliyinə gəldikdə bununla əlaqədar olaraq dövlətin müvafiq qurumları var və onlar həmin şəxsləri axtarıb tapmalıdır. Hesab edirəm ki, ictimai qınaq da burada öz müsbət rolunu oynaya bilər. O baxımdan ölkə başçısı müşavirədə ciddi mesaj verdi.
Düşünürəm ki, müvafiq hüquq-mühafizə orqanları, prokurorluq, milli təhlükəsizlik xidməti bu məsələyə münasibət bildirməli, onların kimliyi açıqlanıb ifşa olunmalıdır"- millət vəkili bildirib.