"Müxalifətin “xalq düşməni” damğası" - Azay Quliyev - MÜSAHİBƏ
“Arif Hacılı kimi antiiqtidar, antihökumət adamı xəyanətdə suçladılar”
Beynəlxalq təşkilatların Azərbaycana qarşı yersiz iddiaları cəmiyyətin haqlı narazılığına səbəb olub. Xüsusən, olkədə insan hüquqları ilə bağlı problemlərin şişirdilməsi vətəndaş cəmiyyətində müzakirə predmetinə çevrilib. Onu da qeyd edək ki, bu ittihamlar əsasən iqtidarın ünvanına səsləndirilir. Məsələn, beynəlxalq təşkilatlar iddia edirlər ki, guya Azərbaycanda iqtidar qarşı tərəfin hüquqlarını pozur, sərbəst toplaşmaq azadlığını təmin etmir, siyasi və vicdan məhbuslarını azadlığa buraxmır, həmçinin, siyasi partiyaların dövlət hesabına maliyyələşməsi məsələsinə onları cəlb etmir və sair. Millət vəkili, Prezident Yanında QHT-lərə Dövlət Dəstəyi Şurasının sədri Azay Quliyev isə tamamilə fərqli düşünür.
-Azay müəllim, beynəlxalq təşkilatların Azərbaycanda demokratiyanın boğulması ilə bağlı səsləndirdikləri fikirləri nə dərəcədə haqlı hesab edirsiniz? Məsələn, konkret olaraq iddia edirlər ki, Azərbaycanda vətəndaşların sərbəst toplaşmaq azadlığı məhdudlaşdırılır.
- Gəlin, konkret olaraq elə sərbəst toplaşmaq azadlığı məsələsindən danışaq. Bu məsələ Azərbaycan qanunvericiliyində ən yüksək səviyyədə öz əksini tapıb. Aksiya keçirmək istəyən qüvvələr tərəfindən müraciət olunub, Bakı Şəhər İcra Hakimiyyəti də dəfələrlə müvafiq yerlər ayırıb. Onlar həmin "20-ci sahə" deyilən yerdə iki dəfə öz aksiyalarını keçiriblər. Mən səmimi deyirəm, əgər sən bura getməyəcəkdinsə, o zaman axıra qədər getməyəydin. Əgər sən getmisənsə, bunu qəbul etmisənsə və sonra bundan imtina edirsənsə, bu, sadəcə, cığallıqdır. Sənə kimsə hardasa nəsə deyibsə ki, "Eurovision" öncəsi bü cür tədbirlər keçir, polisi görəndə əynindəki köynəyi cır, şəkillər çəkdir, bunu Azərbaycan əleyhinə istifadə edək, bu, yumşaq şəkildə desək, vətəndaşlıq mövqeyindən kənardır, mən hələ vətənpərvərliyi demirəm. Ona görə iqtidar bu məsələdə tam şəkildə haqlıdır desin ki, Azərbaycanda sərbəst toplaşmaq azadlığı sahəsində heç bir problem yoxdur və onlar üçün şərait yaradılıb.
-Bəs, siyasi məhbuslarla bağlı?
-Siyasi məhbuslarla bağlı məsələ elədir ki, ola bilsin ki, burada müxtəlif motivlər olsun, ola bilsin ki, hər kəsin müxtəlif yanaşması olsun. Biz dəfələrlə görmüşük ki, Azərbaycanla normal dillə danışan zaman, iqtidar-müxalifət münasibətləri normal olan vaxt həmin o iradlar da qəbul olunur, neçə-neçə insan azadlığa buraxılır. Bir neçə dəfə demişəm ki, əgər gənc bloggerlər- Adnan Hacızadə və Emin Millinin məsələsi vaxtında bu qədər siyasiləşməsəydi, bu qədər istismar olunmasaydı, Azərbaycana qarşı təzyiq vasitəsinə çevrilməsəydi, onlar əminəm ki, daha tez azad olunacaqdılar. Bu o demək deyil ki, onlar günahsız və günahlı idilər, sadəcə, hüquqi prosedurlar var. Eyni şəkildə, sabiq deputat Arif Hacılının "Eurovision"la bağlı dövlət başçısına bir müraciəti oldu və o müraciətində qeyd etdi ki, hər bir şeyi bir tərəfə qoyaq, biz Azərbaycanın maraqlarını ilk növbədə güdməliyik. Bu, iqtidara da aid olunurdu, müxalifətə də. Amma ona nə reaksiya verdilər? "Azadlıq" qəzetinə baxın, orada nələr deyilmədi, sən səhv etmisən, sən satqınsan, sən tarixi cinayətə yol vermisən və sair. Bu, dialoqa bir balaca olsa belə, cücərti yaradırdı ki, hökumət də bunu nəzərə alsın və sonradan bu dialoqu başlasın. Amma yenə deyirəm, nə reaksiya verdilər? Arif Hacılı kimi antiiqtidar, antihökumət adamı xəyanətdə suçladılar. Niyə digər jurnalistlər buna reaksiya vermədilər, demədilər ki, ay kişilər, burada dialoqdan danışırıq, münasibətləri yaxşılaşdırmağa çalışırıq, siz isə bunu "xalq düşməni" elan edirsiniz? Belə olan halda, o biriləri dialoqdan danışa bilərmi? O zaman dərhal deyəcəklər ki, sən satqınsan. Yəni, bunu dəyişmək lazımdır.
-Siyasi partiyaların maliyyələşdirilməsi məsələsində iqtidarın mövqeyini məqbul hesab etmək olar?
- Siyasi partiyaların maliyyələşməsi məsələsinə gəlincə, bununla bağlı parlamentdə qanun qəbul olunub. İlk dəfədir ki, siyasi partiyalara maliyyə ayrılacaq və bundan hamı ədalətli bir bölgü şəklində faydalanacaq. Eyni zamanda hesab edirəm ki, bu, Azərbaycanda siyasi partiyalarla bağlı çox ciddi instusional dəstək kimi qiymətləndirilməlidir.
-Beynəlxalq qurumlar iddia edirlər ki, bu maliyyələşmədən nüfuzlu müxalifət partiyaları deyil, əslində hökumətyönlü müxalifət partiyaları yararlanacaqlar.
-Hesab edirəm ki, bu hüquqi baxımdan da, siyasi baxımdan da yanlış bir fikirdir. Hüquqi baxımdan yanlışdır ki, onlar etiraf edirlər ki, heç vaxt parlamentdə təmsil olunmayacaqlar. Ancaq bu qanun bir günlük, bir illik, bir partiya üçün yazılmayıb. Bu qanun ümumiyyətlə, bir qanunvericilik sənədi kimi yazılıb, qəbul edilib və burada da-parlamentdə təmsil olunmayanlar mən hesab etmirəm ki, nə vaxtsa Milli Məclisə seçilməyəcəklər. Amma bunlar özləri bəri-başdan etiraf edirlər ki, bu gedişlə özlərini parlamentdən kənarda qoyacaqlar, orada təmsil olunmayacaqlar. Bu baxımdan, bu yanaşma ilk öncə siyasi baxımdan yanlışdır, ikincisi də, hüquqi baxımdan nöqsanlı bir mövqedir.
Alim