Mədəniyyət
Rəsmlər açıq səma altında çəkiləcək
İyunun 3-də İçərişəhərdə yerləşən “Art Tower” rəsm qalereyasında “İsveç Azərbaycan rəssamlarının gözü ilə” adlı plener keçiriləcək. Olaylar.az bildirir ki, Plener İsveçin ölkəmizdəki səfirliyinin təşəbbüsü, İçərişəhər” Dövlət Tarix-Memarlıq Qoruğu İdarəsi, Mədəniyyət Nazirliyi və “Arts Council Azerbaijan” qeyri-hökumət təşkilatının dəstəyi ilə reallaşacaq.
Kinematoqrafçılar İttifaqı məqalə müsabiqəsinin vaxtını uzatdı
Azərbaycan Respublikası Kinematoqrafçılar İttifaqı Azərbaycan kinosunun 120 illik yubileyi münasibətilə elan etdiyi “Azərbaycan kinosu: dünən, bu gün, sabah” adlı məqalə və resenziyalar müsabiqəsinin vaxtını uzadıb. Müsabiqəyə marağın çox olduğu nəzərə alınaraq vaxt bir ay uzadılıb. Müsabiqədə iştirak etmək istəyənlər məqalə və resenziyalarını iyun ayının sonunadək Azərbaycan Respublikası Kinematoqrafçılar İttifaqına təqdim edə bilərlər.
Fotoqraflar Birliyində “Açıq qapı”
İyunun 2- də Azərbaycan Fotoqraflar Birliyində "açıq qapı" günü keçiriləcək. Olaylar.az bildirir ki, tədbirdə AFB üzvləri, peşəkar və həvəskar fotoqraflar dəvət olunurlar. "Açıq qapı" günün də Çelyabinskdə keçirilmiş Fotofest-2018 festivalında iştirak etmiş Rüfət Abas və Ayxan Əhmədov öz təsüratlarını bölüşəcəklər.
Məmməd Əmin Rəsulzadə haqqında daha bir KİTAB
TEAS Press Nəşriyyat Evi Azərbaycan Xalq Cümhuriyyətinin 100 illik yubileyi münasibətilə dövlətçilik tarixinə dair kitabların nəşrini davam etdirir. Olaylar.az bildirir ki, bu günlərdə Cümhuriyyət tarixinə dair daha bir fundamental əsər – “Məmməd Əmin Rəsulzadə: siyasi portret” kitabı çapdan çıxıb. Kitab Azərbaycanın XX əsrdə yaşayıb-yaratmış ən parlaq tarixi simalarından biri olan Məmməd Əmin Rəsulzadənin həyatına və siyasi fəaliyyətinə həsr olunub. Tədqiqat əsərində Məmməd Əmin Rəsulzadənin siyasətə gəldiyi ilk günlərdən mühacirət həyatına qədər davam edən fəaliyyətinin müxtəlif dövrləri işıqlandırılır. Əsərdə onun keşməkeşli həyat sürməsinə baxmayaraq, son nəfəsinədək milli ideallar uğrunda prinsipial mübarizə aparması öz əksini tapıb.
Uşaqlar günündə xeyriyyə yarmarkası
İyunun 1-də UAFA Uşaqlara Dəstək Təşkilatı və Milli İncəsənət Muzeyinin birgə təşkilatçılığı ilə “3 alma” nın sponsorluğu ilə çap olunan “Əgər sehrli çubuğum olsaydı...” adlı kitabın təqdimat mərasimi keçiriləcək. Olaylar.az bildirir ki, hər səhifəsində xüsusi qayğıya ehtiyac duyan uşaqların arzu və xəyallarının yer aldığı bu kitab, müvafiq dövlət qurumlarının diqqətini cəlb etməli və incəsənət vasitəsilə xüsusi qayğıya ehtiyacı olan uşaqların sosiallaşması üzrə platformanın yaradılması və inkişafı dövlət və özəl sektorların davamlı əməkdaşlığı istiqamətində önəmli bir addım olmalıdır.
