"Barselona" 14 futbolçu ilə yollarını ayırır

İspaniyanın "Barselona" futbol klubu əsas heyətdə dəyişikliklər etmək niyyətindədir.
Trend xarici KİV-ə istinadən məlumat verir ki, kataloniyalıların baş məşqçisi Tito Vilanova bir neçə oyunçunun xidmətindən imtina edərək 22 nəfərlik heyət formalaşdıracaq. "Barselona" klubunun prezidenti Sandro Rosel də təsdiqləyib ki, komandanın əsas heyətində ixtisarlar olacaq.
Yayda "Barselona" klubunun icarədə olan futbolçuları geri qayıtdıqdan sonra oyunçuların ümumi sayı 36 olacaq. Deməli, kataloniyalılar 14 futbolçunu transferə çıxaracaq. Aleksis Sançes, Viktor Valdes, David Vilya, İsaak Kuenku, Adriano, İbrahim Afellay və Andreu Fontasın klubu tərk edəcəkləri gözlənilir.