"Qəbələ" klubunda yeni məşqçi

"Qəbələ" Futbol Akademiyasında yeni məşqçi təyinatı gerçəkləşib. Azerisport.az xəbər verir ki, karyerasını yeni bitirmiş Sahil Kərimov akademiyada qapıçı məşqçisi kimi fəaliyyətə başlayıb. Futbolçu karyerası boyunca "Avtomobilçi", "Viləş", "Kəpəz", "Şəmkir", "Energetik", "Karvan", "Qarabağ" kimi klublarda forma geyən Kərimov son olaraq ötən mövsüm "Sumqayıt"ın çərçivəsini qoruyub. "Qəbələ" Futbol Akademiyası məşqçi kimi 33 yaşlı mütəxəssisin ilk iş yeri olacaq.
Sahil Kərimov təyinatla bağlı təəssüratlarını paylaşıb: "Qəbələ" böyük hədəfləri olan klubdur. Bu kollektivdə olmaq sevindiricidir. Azərbaycan futbolunda əvvəllər qapıçı məktəbi daha yuxarı səviyyədə olub. Amma son zamanlar sözügedən mövqedə yerli futbolçu qıtlığı hiss olunur. Məqsədim təcrübəmdən, öyrəndiklərimdən və öyrənəcəklərimdən yararlanaraq güclü qapıçıların yetişdirilməsində pay sahibi olmaqdır. Bu məqsədə nail olmaqla həm əsas komandamızı, həm də milli komandaları yüksək səviyyəli qapıçılarla təmin edə bilərik". (klub saytı)