Süni intellekt nadir xəstəliklərin səbəbini proqnozlaşdırır- ÖZƏL

ABŞ-ın İkana Tibb Məktəbinin (Mount Sinai) alimləri süni intellektə əsaslanan yeni bir alət hazırlayıblar. Bu alət təkcə təhlükəli genetik mutasiyaları müəyyən etmir, həm də həmin mutasiyaların konkret olaraq hansı xəstəliklərə səbəb ola biləcəyini proqnozlaşdırır. Olaylar.az xəbər verir ki,  araşdırmanın nəticələri Nature Communications (NatCom) elmi jurnalında dərc olunub.
Yeni metod V2P (Variantdan Fenotipə) adlanır. Bu yanaşma DNK-da baş verən konkret dəyişikliklərin klinik nəticələrini - yəni orqanizmdə hansı əlamət və xəstəliklərə yol aça biləcəyini əvvəlcədən müəyyən etməyə imkan verir.
V2P sistemi geniş məlumat bazaları üzərində təlim keçib. Bu bazalara həm patogen, həm də zərərsiz genetik variantlar, eləcə də klinik və bioloji məlumatlar daxildir. Alət DNK analizini xəstənin klinik vəziyyəti ilə birgə qiymətləndirərək daha dəqiq nəticələr təqdim edir.
Tədqiqatçılar bildirirlər ki, V2P nadir və mürəkkəb xəstəliklərin diaqnostikasında xüsusilə faydalı ola bilər. Bu metod genetik diaqnostikanın sürətini və dəqiqliyini artırmaqla yanaşı, səhiyyə sistemində yeni imkanlar yaradır. Eyni zamanda, V2P aləti alimlərə müəyyən xəstəliklərin əsasını təşkil edən genləri və bioloji mexanizmləri aşkar etməyə kömək edir. Bu isə gələcəkdə daha hədəfli və effektiv dərmanların hazırlanmasına yol aça bilər.