Aİ Rusiyanı danışıqlar masasına oturtmaq üçün yeni sanksiyalar paketi hazırlayır – ÖZƏL

Olaylar.az xəbər verir ki, Avropa Komissiyasının (AK) sədri Ursula fon der Leyen AK-nın mətbuat xidmətində dərc olunan bəyanatında bildirib ki, Avropa İttifaqı (Aİ) Rusiyanı danışıqlar masasına məcbur etmək üçün yeni sanksiyalar paketi hazırlayır. Eyni zamanda, Rusiyanın Aİ-dəki aktivləri uzun müddətə dondurulub.

Berlin danışıqlarını yekunlaşdırarkən (görüşdə Aİ, ABŞ və Ukrayna nümayəndələri iştirak edirdi), fon der Leyen blokun Rusiyaya qarşı yeni sanksiyalar üzərində işlədiyini bəyan edib.

Onun sözlərinə görə, Aİ nəticədə qan tökülməsinə son qoyacaq hər bir addım üzərində çalışır. Atılması lazım olan ilk addım isə möhkəm atəşkəsdir.

"Buna aparan yol məlumdur. Rusiya nümayiş üçün deyil, nəticə üçün danışıqlar masasına oturmaq üçün davamlı təzyiq hiss etməlidir. Bu məqsədlə Avropa Rusiyanın müharibə xərclərini artırmağa davam edəcək. Biz yeni sanksiyalar paketi hazırlayırıq. Və biz Rusiyanın Aİ-dəki aktivlərini uzun müddətə dondurmuşuq," - fon der Leyen mətbuat xidmətinə istinadən bildirib.

AK sədri həmçinin sülhə gedən yolda iki vacib addımı qeyd edib: Ukrayna üçün təhlükəsizlik zəmanətləri və onun iqtisadi bərpası. Onun sözlərinə görə, sülh müqaviləsi bağlanarkən ərazilər məsələsini Kiyev həll etməlidir.

Aİ-nin yüksək nümayəndəsi olaraq fon der Leyen vurğulayıb ki, Avropa Ukraynanın ən güclü və etibarlı tərəfdaşı olaraq qalacaq.

"Biz Ukraynanın növbəti iki il üçün maliyyə ehtiyaclarının üçdə iki hissəsini, təxminən 90 milyard avronu qarşılamağı təklif etmişik. Buna görə də, bu həftə Avropa Şurasında aparılan müzakirələr həlledici olacaq," - deyə AK rəhbəri bildirib.