Putinin müşavirlərinin “sülh planı” danışığının səs yazısı sızdı

Bloomberg Rusiya prezidenti Vladimir Putinin iki əsas müşaviri - Yuri Uşakov və Rusiya Birbaşa İnvestisiya Fondunun rəhbəri Kiril Dmitriyev arasında baş tutmuş telefon danışığının tam mətnini yayıb.

Məlumata görə, söhbət 29 oktyabr tarixində qeydə alınıb və ABŞ-ın Ukrayna üzrə açıqlanmamış "28 maddəlik sülh planı" fonunda xüsusi diqqət çəkir.

Sızmanın ortaya çıxması Vaşinqtonun hazırladığı sənədin Avropa liderləri tərəfindən sərt tənqid olunduğu bir dövrə təsadüf edir. Ukrayna deputatı Aleksey Qonçarenko həmin planı 20 noyabrda yaymışdı. Bloomberg isə mənbəni açıqlamadan Kreml rəsmilərinin telefon danışığını əldə etdiyini bildirir.

Söhbətin mərkəzində nə var?

Dialoqdan aydın olur ki, Moskva ABŞ-ın hazırladığı plana paralel şəkildə öz "sülh sənədini" formalaşdırıb və onu arxa kanallar vasitəsilə qarşı tərəfə ötürməyə çalışır.

Uşakovun narahatlığı

Kremlin xarici siyasət kuratoru olan Uşakov söhbətdə dəfələrlə bildirir ki, Vaşinqton Rusiyanın təqdim etdiyi mətni dəyişərək "bizlə razılaşdırılıb" kimi təqdim edə bilər. Onun sözlərinə görə, bu görüntü Kremlin siyasi xəttinə zərər vurur və Moskva bunu istəmir.

Dmitriyevin təklifi

Dmitriyev isə əksinə, sənədin "qeyri-rəsmi kanallarla" ötürülməsini, beləliklə də ABŞ tərəfinin bunu "öz təşəbbüsü" kimi göstərməsini təklif edir. O əmin edir ki, mətn Moskvanın maraqlarına uyğunlaşdırılacaq və təhlükəli manipulyasiya olmayacaq.

Sızan dialoqdan əsas sitatlar

Dmitriyev: "Bu, irəliyə doğru çox yaxşı addımdır. Bizim mövqeyi ayrıca sənədə çevirək, mən onu qeyri-rəsmi şəkildə ötürüm".

Uşakov: "Onlar bizim versiyanı qəbul etməyə bilər, amma deyə bilərlər ki, guya bizlə razılaşdırılıb - məni narahat edən budur".

Dmitriyev: "Yox, yox. Siz necə deyəcəksinizsə, mən də bunu sözbəsöz çatdıracağam".

Uşakov: "Onlar sonradan mətni dəyişə bilərlər... bu, real təhlükədir".

Dmitriyev: "Daha sonra siz də Stivlə (ABŞ emissarı Stiv Vitkoff) bu sənəd barədə danışa bilərsiniz".

Sızmanın göstərdiyi mənzərə

Bloomberg-in dərc etdiyi dialoqdan belə görünür:

Moskva ABŞ-ın planı yekunlaşmadan əvvəl öz variantını sızdırmağa çalışıb;

Hədəf - Vaşinqtonun təqdim edəcəyi sülh sənədinin mümkün qədər Kremlin mövqeyinə yaxın formalaşmasıdır;

Kreml arxa kanallarda aktiv koordinasiya aparır və prosesə birbaşa nəzarət etmək istəyir.

Bu səs yazısı həm Rusiyanın diplomatik taktikasına, həm də ABŞ-Rusiya arasında "kölgə danışıqları"nın intensivliyinə dair yeni suallar yaradır. Musavat.com