Nyu-Yorkun yeni meri Ağ Evdə Trampla görüşəcək

ABŞ prezidenti Donald Tramp noyabrın 21-də Ağ Evdə əvvəllər sərt tənqid etdiyi Nyu-York şəhərinin seçilmiş meri Zöhran Mamdani ilə görüşəcək.

Olaylar.az xəbər verir ki, məlumatı Tramp özünə məxsus Truth Social hesabında paylaşıb. Onun sözlərinə görə, Mamdani "görüş tələb edib". Tramp əlavə edib ki, "bu görüşün 21 noyabr cümə günü Ağ Evin Oval Ofisində keçirilməsi barədə razılığa gəlmişik".

Tramp əvvəllər Mamdaninin onunla Vaşinqtonda görüşməyə ümid etdiyini bildirmişdi. Nyu-York şəhərinin meri seçkiləri 4 noyabrda baş tutub. Tramp Nyu-Yorkluları müstəqil namizəd kimi namizəd olan Endryu Kuomoya səs verməyə çağırıb. Amerika lideri həmçinin kommunist hesab etdiyi Mamdani qalib gələrsə, Nyu-York şəhəri üçün federal vəsaitləri məhdudlaşdıracağı ilə hədələyib. Seçilmiş mer özünü "demokratik sosialist" kimi təsvir edir.

5 noyabrda Fox News-a verdiyi müsahibədə Tramp Mamdaninin təşəbbüs göstərməli və ona müraciət etməli olduğunu bildirib. O, həmçinin Nyu-York şəhərini sevdiyini və buna görə də yeni merin uğur qazanmasını istədiyini bildirib. Lakin xəbərdarlıq edib ki, Mamdani Amerika administrasiyasına hörmətlə yanaşmalıdır. (Musavat.com)