Avropa İttifaqı siyasi vəziyyətə görə “Dönüş Nöqtəsi"nə yaxınlaşır

Olaylar.az xəbər verir ki, Avropa İttifaqının üzləşdiyi mürəkkəb iqtisadi və siyasi vəziyyət onun qlobal səhnədəki mövqeyini ciddi şəkildə zəiflədə və müstəqil qlobal güc olma səylərinə son qoya bilər. Bloomberg agentliyinin qeyd etdiyinə görə, Avropa "dönüş nöqtəsinə" yaxınlaşır.

Bu vəziyyət fonunda Avropa elitaları "Aİ-nin tənəzzülünün qaçılmaz olduğunu" göstərən bir çox sübutlarla qarşı-qarşıyadır. Bloomberg bu sübutlar arasında Fransada sağçı siyasi qüvvələrin və avroskeptiklərin güclənməsini, Volkswagen zavodlarının misli görünməmiş şəkildə bağlanmasını, həmçinin Avropa İttifaqının süni intellekt sahəsində tənzimləyici məhdudiyyətlər tətbiq etməsi səbəbindən ABŞ texnoloji nəhənglərinin Avropa bazarını tərk etməsini göstərir.

Agentliyin yazdığına görə, bu hadisələrin hamısı Aİ-nin "vahid və dinamik iqtisadi blok kimi fəaliyyət göstərə bilməməsini" nümayiş etdirir və bu da birlik cəmiyyətinin beynəlxalq statusunu zəiflədir.

Bundan əvvəl bildirilmişdi ki, Avropada Ukraynaya dəstəyi dayandırmağı müdafiə edən partiyalar güclənir. Bu, Ukrayna münaqişəsi ətrafındakı vəziyyəti Rusiya və onun Prezidenti Vladimir Putinin xeyrinə dəyişdirir.