Çin və Braziliya Ukrayna münaqişəsinin həlli üçün "Sülh Dostları" platforması yaradacaq- ÖZƏL

Olaylar.az xəbər verir ki, Çin və Braziliya, qlobal Cənub ölkələri ilə birlikdə Ukrayna münaqişəsinin həlli üçün yeni bir təşəbbüs irəli sürüblər. "Sülh Dostları" adlı platformanın yaradılması qərarı Nyu-Yorkda Braziliya prezidentinin xüsusi nümayəndəsi Selsu Amorim ilə görüş zamanı Çinin xarici işlər naziri Van İ tərəfindən elan edilib.

Çinin Xarici İşlər Nazirliyinin açıqlamasına görə, Van İ bu platformanı Çin, Braziliya və qlobal Cənub ölkələrinin sülhə nail olmaq üçün atdığı mühüm bir addım kimi xarakterizə edib. O, platformanın inklüziv dialoqa əsaslanacağını və rəqabətə və ya qarşıdurmaya deyil, əməkdaşlığa yönələcəyini vurğulayıb.

Van İ beynəlxalq ictimaiyyəti bu platformanın yaradılmasını müsbət qarşılayaraq onu obyektiv və rasional səs üçün mühüm bir meydança kimi qəbul etməyə çağırıb. Platformanın Ukrayna münaqişəsinin siyasi yolla həllində konstruktiv rol oynayacağı qeyd edilib.

Bundan əvvəl Van İ, Çin hökumətinin Ukraynaya beşinci humanitar yardım partiyasını göndərməyə hazır olduğunu da bəyan edib.