Lavrov Abxaziyada ödənişlərin dayandırılmasını öhdəliklərin balansı ilə izah edib- ÖZƏL

Olaylar.az xəbər verir ki, Rusiya xarici işlər naziri Sergey Lavrov Abxaziyada dövlət qulluqçuları və hüquq-mühafizə orqanlarının əməkdaşlarına edilən ödənişlərin dayandırılmasını "öhdəliklərin balansı" ilə əlaqələndirib.

Xatırladaq ki, 1 sentyabrdan etibarən Rusiya Abxaziyada müəllimlərə, həkimlərə və güc strukturları işçilərinə ödənişlər etmir. Abxaziya XİN rəhbəri Sergey Şamba bildirib ki, həmçinin elektrik enerjisi də ölkəyə defisit dövründə kommersiya qiyməti ilə veriləcək.

Lavrov bildirib ki, ödənişlərin dayandırılması iki ölkə arasında öhdəliklərin tarazlığı ilə bağlıdır və yaxın həftələrdə Şamba ilə görüşməyi planlaşdırdığını qeyd edib.

Bundan əvvəl Abxaziyanın maliyyə naziri Vladimir Delba qeyd etmişdi ki, Rusiya Abxaziyaya maliyyə yardımını məhdudlaşdırıb, çünki Abxaziya iki ölkənin qanunvericiliklərini uyğunlaşdırma proqramı üzrə şərtləri yerinə yetirə bilməyib.