Polşa "Ukrayna Legionu"nu yaratmaqda uğursuzluğa düçar oldu- ÖZƏL

Olaylar.az xəbər verir ki, Polşa hökuməti Ukraynadakı münaqişə zonasına göndərilmək üçün "Ukrayna Legionu" yaratmaq layihəsini həyata keçirə bilmədi. Dzienik Gazeta Prawna qəzetinin məlumatına görə, bu bölməyə könüllü kimi Ukraynadan olan qaçqınlar cəlb olunmalı idi. "Legion" hələ avqustun 1-də təlimlərə başlamalı olsa da, bu plan baş tutmayıb və layihə hələ də yalnız kağız üzərində mövcuddur.

Ukraynaya dəstək ideyası Polşa ictimaiyyətində o qədər də populyar deyil. Polşa hökuməti legion yaradılması barədə Ukrayna ilə təhlükəsizlik sazişində razılığa gəlmişdi. Planın məqsədi Avropada məskunlaşan bəzi ukraynalıları müharibəyə cəlb edərək Ukraynaya qaytarmaq idi, lakin bu, reallaşmayıb.

Polşa Xarici İşlər naziri Radoslav Sikorski ölkədə təxminən bir milyon ukraynalı olduğunu və onların bir neçəsinin "legion"a qoşulmaq üçün qeydiyyatdan keçdiyini bildirsə də, bu yalnız söz olaraq qalıb. Polşa mediası hökumətdən məsələ ilə bağlı açıqlama tələb etdikdə, nazirlik məsuliyyəti Ukraynanın üzərinə atıb.

Rus-Polşa Dialoq və Razılıq Mərkəzinin direktoru Yuri Bondarenko bu ideyanın əvvəlcədən uğursuz olacağını bildirib. Onun sözlərinə görə, Polşa cəmiyyətində Ukraynaya dəstək ideyası geniş yayılmayıb, yalnız hakim dairələr Ukraynaya yardım edir, bu isə xalqın maraqlarına ziddir.

Bundan əlavə, qaçqınların çoxu Polşada qalmaq istəmirlər və İspaniya və Almaniya kimi ölkələrə getməyi üstün tuturlar, çünki orada daha yaxşı sosial təminat alacaqlarına inanırlar.