Hacı Şahinin yerinə təyinat bu tarixdə olacaq

Dini Qurumlarla İş üzrə Dövlət Komitəsinin sədri Mübariz Qurbanlı Məşədi Dadaş məscidinə imamın təyin edilməsi ilə bağlı məsələyə aydınlıq gətirib.

Olaylar.az Trend-ə istinadən bildirir ki, M.Qurbanlı bu gün "Din və qlobal təhlükəsizlik" adlı konfrans çərçivəsində jurnalistlərə deyib ki, Məşədi Dadaş məscidinin imamı Hacı Şahin Həsənlinin vəfatından sonra İlahiyyat İnstitutunun tələbəsi Elmir Vəliyev məsciddə dini ayinləri, Cümə namazlarını icra edir.

"Biz bunu Məşədi Dadaş məcsidinin icması ilə də müzakirə etmişik. Ənənəvi olaraq 40 mərasimindən sonra məscidə din xadimləri təyin olunacaq. Əminəm ki, Elmir də orada fəaliyyətini davam etdirəcək", - deyə M.Qurbanlı bildirib.

Keçmiş Əbu Bəkir məscidinin açılması məsələsinə münasibət bildirən M.Qurbanlı qeyd edib ki, məsciddə təmir işləri Bakı Şəhər İcra Hakimiyyəti tərəfindən həyata keçirilir və məscidin yaxın zamanlarda açılışının olması gözləniləndir.