“Bəlkə  cəmiyyətdəki  problemlərin bir hissəsini təhsildə axtarmaq lazımdır”- Əkrəm Bəydəmirli

"Cəmiyyətin  anlaqsız  duruma düşməsi   və yaxud inkişafı  həm də  yaxşı təhsillə,  öz sənətini sevən müəllimlə  bağlıdır". "Olaylar" xəbər verir ki, bunu deyən Sosial Rifah və Tədqiqatlar İctimai Birliyinin sədri Əkrəm Bəydəmirlinin sözlərinə görə, bəlkə  cəmiyyətdəki,  canlı, şüurlu varlıqlardakı  problemlərin   bir  hissəsini   təhsildə axtarmaq  lazımdır. Ona  görə ki,  bütün  sənət sahibləri parta arxasından  çıxaraq  müstəqil həyata,  bu cəmiyyətə    yol  açırlar.  İkinci ailə  sayılan   məktəb, oradakı  müəllimlər   azyaşlı  uşağın  gələcək  taleyini   müəyyən edir.  Gələcək   biznesmenin, polisin, həkimin, mühəndisin  və s.   əxlaqlı  dünyagörüşü,   vətəndaşlıq mövqeyi   məhz orta  məktəb  partasından  formalaşır.   Zəncirvari   proses  olan  bu məqamlarda  baş verən  hər hansı   qüsurlar, buraxılan  səhvlər    gündəlik həyatımızda,  cəmiyyətimizdə   özünü   bütün  çılpaqlığı ilə   büruzə  verir: "Ümumiyyətlə,  təhsil  sahəsindəki   çatışmazlıqlar,   çap edilən  dərsliklərin  yarasızlığı,  bu sistemdə qeyri  şəffaflıq barəsində   KİV-lərdə  fikirlər səslənir.  Narahatçılıq doğuran odur  ki, bu   qədər   qaldırılan məsələlər, ictimailəşən   problemlər   həllini    tapmır. Dövlətin  böyük vəsaiti hesabına     bu il  nəşr olunan  bəzi  dərsliklərin    gələn  il   istifadəsinə  icazə verilmir. Müqayisə aparanda   görürsən ki,  bu yeni  kitab   şagird  üçün əvvəlkindən daha  çətindir, mahiyyətinə görə,    isə  qüsurludur. Əslində   cəmiyyətin  anlaqsız  duruma düşməsi   və yaxud inkişafı    yaxşı təhsillə, öz sənətini sevən müəllimlə  bağlıdır.   Bəlkə  yaxşı təhsil   dalınca xarıci ölkələrə getmək  imkanı  olmayanlar  üçün burada  bu şəraiti  yaratmaq mümkün oldu.  Necə  düşünürsünüz?

Təhsilin   və  cəmiyyətin inkişafında Yaponiyanın   təcrübəsi diqqəti cəlb edir.  İkinci   dünya  müharibəsində   tamamilə  məğlub  edilmiş,   təbii ehtiyatları   yox səviyyəsində olan Yaponiya    öz təhsili    ilə  dünya arenasına  çıxdı. Ağılagəlməyən  inkişafı ilə      bu   gün   hamını  heyrətləndirir. Həmin   keyfiyyətli texnologiyanı    yaratmaq   və  dünyada  qəbul  elətdirmək  üçün   yüksək təhsil   lazım idi. Yaponlar  bunu  qura  biliblər. Azərbaycanda  da  hay-küydən    uzaq olub   cəmiyyətin  peyvəndini   tapmaq  gərəkdir.  Deyəsən   bu     normal təhsildən, millətin,  dövlətin  inkişafına  xidmət edən   vicdanlı  münasibətdən   başlayır. Sonda  müəllim adını uca tutan, millətin övladlarına ləyaqətlə  işıq verən müəllimləri təbrik edirəm!"