Qaraş Mədətovun 90 illik yubileyi qeyd olunub
Azərbaycan Milli Elmlər Akademiyasının Tarix İnstitutunda AMEA-nın müxbir üzvü, əməkdar elm xadimi Qaraş Mədətovun (1928-1993) 90 illik yubileyi qeyd olunub. Tarix İnstitutundan Olaylar.az –a verilən məlumata görə, tədbir AMEA-nın Rəyasət Heyətinin qərarına əsasən təşkil olunub. Yubiley tədbirini giriş sözü ilə açan Tarix İnstitutunun direktoru, akademik Yaqub Mahmudov bildirib ki, Qaraş Mədətov Azərbaycanın müasir tarixini öyrənən elmi məktəbin yaradıcılarından biri olub: “O, 1968-ci ildən ömrünün sonunadək Tarix İnstitutunun “Azərbaycanın müasir dövr tarixi” şöbəsinə rəhbərlik edib”.
.jpg)
Azərbaycan Milli Elmlər Akademiyasının Tarix İnstitutunda AMEA-nın müxbir üzvü, əməkdar elm xadimi Qaraş Mədətovun (1928-1993) 90 illik yubileyi qeyd olunub.
Tarix İnstitutundan Olaylar.az -a verilən məlumata görə, tədbir AMEA-nın Rəyasət Heyətinin qərarına əsasən təşkil olunub.
Yubiley tədbirini giriş sözü ilə açan Tarix İnstitutunun direktoru, akademik Yaqub Mahmudov bildirib ki, Qaraş Mədətov Azərbaycanın müasir tarixini öyrənən elmi məktəbin yaradıcılarından biri olub: "O, 1968-ci ildən ömrünün sonunadək Tarix İnstitutunun "Azərbaycanın müasir dövr tarixi" şöbəsinə rəhbərlik edib".
Tədbirdə tarixçi alimlər Ədalət Qasımov və Cəbi Bəhramovun məruzələri dinlənilib.
Akademik Teymur Bünyadov, AMEA-nın müxbir üzvləri Nizami Xudiyev, Vəli Əliyev, professor Rəhilə Quliyeva və başqaları Qaraş Mədətovun Azərbaycan tarixinə verdiyi elmi töhfələrdən bəhs etmişlər.
Tədbirdə Q.Mədətovun "Azərbaycan Böyük Vətən Müharibəsi illərində" monoqrafiyasının yenidən işlənmiş və təkmilləşdirilmiş nəşrinin təqdimatı keçirilib. Yeni nəşr "Azərbaycan SSR 1941-1945-ci illər müharibəsində" adlanır. Kitab Tarix İnstitutunun Elmi Şurasının qərarı ilə çap olunub. Layihə rəhbəri akademik Yaqub Mahmudov, nəşrin elmi redaktorları isə tarixçi alimlər Cəbi Bəhramov və Elmar Məhərrəmovdur.
Azərbaycan tarixinin tədqiqi və təbliği sahəsində böyük xidmətlərinə görə Q.Mədətov 1983-cü ildə AMEA-nın müxbir üzvü seçilmiş, 1990-cı ildə isə "Əməkdar elm xadimi" fəxri adına layiq görülmüşdür.
Tədbirdə görkəmli alimin oğlu Tofiq Mədətov atasının xidmətlərinin yüksək qiymətləndirilməsinə, xatirəsinin əziz tutulmasına və tədbirin təşkilinə görə ailəsi adından minnətdarlığını bildirib. Sonda tədbir iştirakçıları Qaraş Mədətovun elmi-pedaqoji fəaliyyətini əks etdirən kitablar və monoqrafiyalardan ibarət sərgiyə baxmışlar.