Moskva Ermənistanda hərbi mövcudluğunu təmin etməyə çalışır- ÖZƏL

"Moskva İrəvanı yenidən öz orbitinə qaytarmaq və bölgədə maraqlarını təmin etmək üçün Bakı və Ankaranın da rolundan faydalanmağa çalışır". "Olaylar" xəbər verir ki, bunu siyasi şərhçi Mürtəza Bünyadlı deyib: "Moskva "3+3" formatında əməkdaşlıq, İrəvanın "Sülh kəsişməsi" regional nəqliyyat layihəsinin reallaşması ilə bağlı verdiyi açıqlamalar bunun sübutudur.  Lavrov bildirib ki, Ermənistan "Sülh kəsişməsi" layihəsini reallaşdırmaq istəyirsə, o zaman Azərbaycanla sülh sazişi imzalamalı, Ankara ilə münasibətlərini normallaşdırmalıdır. Bu isə o deməkdir ki, İrəvan Bakının Zəngəzur dəhlizi ilə bağlı təklifini qəbul etməlidir. Rusiya Zəngəzur dəhlizinə nəzarət etmək şərti ilə açılmasında maraqlıdır və bu məsələ 2020-ci il 10 noyabrda imzalanan üçtərəfli birgə bəyanatın 9-cu bəndində əksini tapıb. Həmin bəyanatın 9-cu bəndinə əsasən Azərbaycanla Naxçıvan arasında Zəngəzur dəhlizi açılır və dəhlizə nəzarəti rus sərhədçiləri edir. Moskva Ermənistanda siyasi, iqtisadi maraqları ilə yanaşı, hərbi iştirakını təmin etməyə çalışır".