QDİƏT PA-nın vitse-prezidenti Azərbaycanda keçirilən Prezident seçkilərində səsvermədə geniş iştiraka görə seçicilərə təşəkkür edib
Səsvermə prosesinə göstərilən marağa və geniş iştiraka görə dərin minnətdarlığımı bildirirəm.
Olaylar.az-ın məlumatına görə, bunu Rumıniya parlamentinin üzvü, Qara Dəniz İqtisadi Əməkdaşlıq Təşkilatı Parlament Assambleyasının vitse-prezidenti Daniel Konstantin mətbuat konfransında deyib.
"Səsvermə ilə bağlı çoxlu görüşlərimiz olub, amma düşünürəm ki, ən vacib görüş Mərkəzi Seçki Komissiyasının sədri ilə keçirdiyimiz görüşdür. Onların bu gün necə təşkil etdiyini müzakirə etdik və bu çox yaxşı görüşə görə bir daha təşəkkür etmək istərdim. Bu gün biz bir çox seçki məntəqələrində olmuşuq, seçicilərlə və seçki prosesini izləyənlərlə müzakirələr aparmışıq.
Sizə deməliyəm ki, mən demokratiya və ifadə azadlığı üçün əsas hesab etdiyim səsvermə prosesində böyük maraq və geniş iştiraka görə dərin minnətdarlığımı bildirirəm",- o qeyd edib.
Qeyd edək ki, ABŞ-nin "Oracle Advisory Group" təşkilatı Azərbaycanda növbədənkənar Prezident seçkilərinin "exit-poll" nəticələrini elan edib. Təşkilatın əsas tərəfdaşı George Birnbaum bildirib ki, seçicilərin 93,9 faizi İlham Əliyevə səs verib.
Sosioloji Tədqiqatlar Mərkəzi də Azərbaycanda növbədənkənar Prezident seçkilərinin "exit-poll" nəticələrini elan edib. Mərkəzin məlumatında bildirib ki, seçicilərin 92,4 faizi İlham Əliyevə səs verib.
"Rəy" Monitorinq Mərkəzi Azərbaycanda növbədənkənar Prezident seçkilərinin "exit-poll" nəticələrinə əsasən isə seçicilərin 92.6 faizi İlham Əliyevə səs verib.
Xatırladaq ki, bu gün Azərbaycanda Prezident seçkiləri keçirilib. Prezident seçkilərində 7 nəfərin namizədliyi qeydə alınıb. Onlardan 5 nəfərin namizədliyi siyasi partiyalar tərəfindən, 2 nəfərin namizədliyi öz təşəbbüsü ilə irəli sürülüb. Yanvarın 9-da prezidentliyə namizədliyin qeydə alınması başa çatıb.
Seçici siyahılarında 6 milyon 478 min 623 seçicinin adı var. Onlar ölkə üzrə 6537 məntəqədə səs veriblər.
Seçkiləri izləmək üçün indiyə qədər 90 372 müşahidəçi qeydə alınıb. Onların 790 nəfəri 72 beynəlxalq təşkilatı təmsil edən müşahidəçilərdir. Bu müşahidəçilər 89 ölkədəndir.
Seçkilər bütün Azərbaycan ərazisini, o cümlədən, işğaldan azad edilmiş əraziləri əhatə edib. İşğaldan azad edilən ərazilərdə 26 seçki məntəqəsi yaradılıb.
Xaricdə olan Azərbaycan vətəndaşları üçün 37 ölkədə səfirlik və konsulluqlarda 49 seçki məntəqəsi yaradılıb. Həmin məntəqələrdə 23 mindən artıq seçici səsvermə hüququndan istifadə edib.
Seçkilərdə 190 beynəlxalq media qurumu iştirak edib. Onların 216 təmsilçisi beynəlxalq müşahidəçi kimi qeydə alınıb.
Səsvermə günü adı seçici siyahısında olan, amma məntəqələrə gəlmək imkanı olmayan seçicilərə Seçki Məcəlləsinin tələbinə görə daşınan qutu çatdırılıb.