Azərbaycan-Rusiya münasibətləri ötən illər ərzində uğurla inkişaf edib
Sevinc Fətəliyeva: "Sergey Lavrovun ölkəmizə səfəri və aparılan müzakirələr regionda sülhün təmin olunmasına müsbət təsir göstərəcək"
Rusiyanın xarici işlər naziri Sergey Lavrovun Azərbaycana səfəri bir sıra qaranlıq nüanslarla yadda qaldı. Buna səbəb Rusiya xarici siyasət idarəsinin rəhbərinin Laçın dəhlizi ilə bağlı verdiyi açıqlama olub. Bakıda rəsmi səfərdə olan Rusiyanın xarici işlər naziri Sergey Lavrov deyib ki, Laçın dəhlizində nəzarət-keçid məntəqəsinin yaradılması nəzərdə tutulmur. Nazır bunu rəsmi Bakının Münhen Təhlükəsizlik konfransında Ermənistanla sərhəddə, o cümlədən Laçın dəhlizində nəzarət-keçid məntəqəsi yaradılması ilə bağlı səsləndirdiyi təklifinə münasibət bildirərkən söyləyib. Bildirib ki, Laçın dəhlizindən "istisnasız olaraq mülki və humanitar yüklərin və mülki vətəndaşlarının hərəkətinin" təmin olunması vacibdir və onlar da Rusiyanın sülhməramlı kontingentin xətti ilə buna nail olmağa çalışırlar: "Ancaq dəhlizdən həqiqətən təyinatı üzrə istifadə olunması barədə şübhələri aradan qaldırmaq üçün texniki vasitələrdən istifadə imkanı mövcuddur. Və bu gün biz buna toxunduq, texniki detalların əhəmiyyəti ikinci dərəcəlidir". Səfər çərçivəsində həmçinin müttəfiqlik münasibətlərinin mütərəqqi inkişafı üçün qarşılıqlı meyllərə əsaslanan ikitərəfli əməkdaşlığın vəziyyəti və perspektivlərinin hərtərəfli müzakirəsi, regional və beynəlxalq gündəliyin ən aktual aspektləri, o cümlədən Azərbaycan-Ermənistan münasibətlərinin normallaşması məsələləri ətrafında fikir mübadiləsi aparılıb. Maraqlıdır Lavrovun ölkəmizə səfəri və səfər çərçivəsində verdiyi açıqlamalar Azərbaycan-Rusiya münasibətlərinə necə təsir edəcək?
Millət vəkili , Milli Məclisin Beynəlxalq münasibətlər və parlamentlərarası əlaqələr komitəsinin sədr müavini Sevinc Fətəliyeva deyib ki, ölkəmizin qarşılıqlı faydalı əlaqələrə malik olduğu tərəfdaş ölkələrdən biri də Rusiya Federasiyasıdır. Azərbaycan-Rusiya münasibətləri ötən illər ərzində uğurla inkişaf edib. Rusiyanın xarici işlər naziri Sergey Lavrovun ölkəmizə səfəri də münasibətlərimizin inkişafının göstəricisidir. Deputat bildirib ki, mütəmadi olaraq baş tutan qarşılıqlı səfərlər və görüşlər iki ölkə arasındakı münasibətlərin inkişafına əhəmiyyətli töhfələr verir. Xüsusilə də, dövlət başçılarının görüşləri ikitərəfli münasibətlərin müzakirəsi və əməkdaşlığın dərinləşdirilməsi baxımından müstəsna önəm kəsb edir. O cümlədən, hökumət rəsmiləri və parlament nümayəndələrinin də qarşılıqlı səfərləri prosesdə müsbət rol oynayır. Fevralın 27-də Azərbaycan Prezidenti İlham Əliyev Rusiyanın xarici işlər naziri Sergey Lavrovu qəbul edərkən bu səfərin ötən ilin fevralında Moskvada imzalanmış müttəfiqlik qarşılıqlı fəaliyyəti haqqında Bəyannamənin birinci ildönümünə həsr edildiyini bildirib. Dövlətimizin başçısı vurğulayıb ki, bu Bəyannamə mahiyyət etibarilə bizim münasibətlərimizin ruhunu və xarakterini, əlaqələrimizin formalaşmış müsbət resursunu əks etdirir, gələcək illərdə qarşılıqlı fəaliyyətin yollarını müəyyənləşdirir. Millət vəkilinin sözlərinə görə, Azərbaycanın qonşu dövlətlərlə xoş mərama əsaslanan siyasətinin müsbət təzahürlərini, həmçinin Rusiya ilə münasibətdə görmək mümkündür. Ümumiyyətlə, elə bir fəaliyyət sahəsi yoxdur ki, Azərbaycanla Rusiya sıx əməkdaşlıq etməsin. Azərbaycanla Rusiya arasında əməkdaşlığın yüksələn xətlə inkişafına iki ölkənin dövlət başçıları arasında formalaşan dostluq münasibətlərinin rolunu xüsusi vurğulamaq lazımdır. Ölkələrimiz arasında siyasi dialoq yüksək səviyyədədir. İki ölkənin dövlət başçıları və yüksək səviyyəli rəsmiləri mütəmadi görüşlər keçirərək əməkdaşlığın müxtəlif aspektlərini müzakirə edirlər. Ölkələrimiz arasında qarşılıqlı siyasi, iqtisadi, humanitar və digər sahələr üzrə əməkdaşlığın daha da inkişaf etdirilməsi üçün siyasi iradə mövcuddur: "Vurğulanmalıdır ki, hər iki ölkə başçısının Azərbaycan, Rusiya prezidentləri və Ermənistan baş nazirinin imzaladığı 2020-ci il 10 noyabr tarixli birgə Bəyanatında nəzərdə tutulmuş məsələlərin icrası ilə bağlı vahid mövqe nümayiş etdirməsi, bu razılaşmanın, həmçinin bütün kommunikasiyaların, o cümlədən Azərbaycanın əsas hissəsi ilə Naxçıvan Muxtar Respublikası arasında nəqliyyat dəhlizinin - Zəngəzur dəhlizinin açılması ilə bağlı fikirləri regionun gələcək inkişafı üçün mühüm amildir. Məlumdur ki, Rusiya Cənubi Qafqzazda sülhün və əməkdaşlığın təmin olunması üçün təşəbbüslər göstərir. Prezident İlham Əliyev Sergey Lavrovu qəbul edərkən "Düşünürəm ki, Rusiya bizim dostumuz, müttəfiqimiz və qonşumuz kimi Azərbaycan ilə Ermənistan arasında dövlətlərarası münasibətlərin nizamlanmasına kömək işində xüsusi rola malikdir. Ötən il bu istiqamətdə mühüm səy göstərilib, gələcək sülh müqaviləsinin konseptual xarakterini, məhz iki ölkənin ərazi bütövlüyünün və suverenliyinin qarşılıqlı tanınmasını müəyyən edən sənədlər qəbul olunub. Bu, ötən ilin oktyabrında Praqada və Soçidə qəbul edilmiş sənədlərlə təsdiqlənib. Bu sənədlər sülh müqaviləsinə nail olmaq üçün istifadə edilə bilən təməldir"- deyə vurğulayıb. Azərbaycan regionda sülh və təhlükəsizliyin təmin olunmasına, Ermənistanla münasibətlərin normallaşdırılmasına tərəfdardır. Ümid edirik ki, Sergey Lavrovun ölkəmizə səfəri və səfər çərçivəsində aparılan müzakirələr regionda sülhün təmin olunmasına müsbət təsir göstərəcək".
Alim