İdarəetmə strukturunu təkmilləşdirmək üçün kiçik rayonlar ləğv edilməlidir

"Azərbaycan Milli Elmlər Akademiyasının Coğrafiya İnstitutu Azərbaycanda bəzi kiçik rayonların ləğv edilməsini təklif edir. Mənim qənaətimcə, gerçəkdən bu çox səmərəli təklifdir". Bunu "Olaylar"a deyən  Sosial Rifah və Tədqiqatlar İctimai Birliyinin sədri  Əkrəm Bəydəmirlinin sözlərinə görə, ötən əsrin 90-cı illərindən başlayaraq idarəetmə strukturunun yumşaq desək yanlışlığı nəticəsində Azərbaycanda bir sıra yeni rayonlar yaradıldı: "Həmin dövrdən başlayaraq dövlət üçün əlavə yükə çevrilən belə rayonlarda yeni ştat vahidlərinin yaradılması yalnız bəzi məmurlar üçün faydalı oldu. Bakı şəhərinin qəsəbələrinin  əhalisindən  sayı az olan belə kiçik rayonlarda icra hakimiyyətlərinin formalaşması, dəbdəbəli binalar, bütün ştat vahidlərinin bərqərar olması yerli əhali  və dövlət üçün  əhəmiyyətli ola bilməz.

Bu gün  Qobustan, Samux, Xızı və digər kiçik rayonların saxlanması yükündən dövlət azad olmalıdır. Bu rayonların birləşdirilməsi nəticəsində daha çevik, müasir dövrün tələblərinə cavab verən  idarəetmə struktuları yaradılmalıdır. Bu qurumlarda dövlət tərbiyəsi olan, imanlı, intellektli insanlar çalışmalıdır. Yeni formalaşacaq bu qurumlar qanun aliliyini qorumaq şərtilə azad sahibkarlıq subyektlərinin inkişafını əsas istiqamət kimi müəyyən etməlidirlər. O zaman  regional iqtisadiyyat inkişaf edər, dövlət əlavə yükdən azad olar və nəhayət əhalinin güzəranında əhəmiyyətli dəyişiklik baş verər".