Dövlət başçısının Fərmanı həm də geosiyasi mahiyyətlidir

"Prezident İlham Əliyevin Azərbaycan Respublikasında iqtisadi rayonların yeni bölgüsü haqqında Fərmanı heç şübhəsiz ki,  günün reallığından doğan  bir  addımdır, amma strateji hədəflidir". "Olaylar" xəbər verir ki, bunu deyən millət vəkili Sahib Alıyevin sözlərinə görə,  strateji hədəfli deyərkən təkcə iqtisadiyyatı nəzərdə tutulmur: "Fikrimcə, bu Fərmanla regionlarda indikindən fərqli, bir tərəfdən daha təmərküzləşmiş, digər tərəfdən isə bələdiyyələrin rolunun  qat-qat artacağı  yeni bir idarəçiliyin himi qoyulur. Detallara varmadan deyim ki, Fərman həm də geosiyasi mahiyyətlidir, ikinci Qarabağ savaşının meydana çıxardığı üstünlüyün daha da dərinləşməsinə və genişlənməsinə xidmət edir. Qarabağ  İqtisadi rayonunun yaradılması o deməkdir ki, bolşeviklərin "kəşf"i olan Dağlıq Qarabağ anlayışı tarixin əbədi zibilliyinə atılır. Şərqi  Zəngəzur iqtisadi rayonunun niyə  yaradıldığı və nə  anlam daşıdığı isə heç kəsə sirr olmasın gərək. Sonda onu da deyim ki, mənə görə, Fərmanın məhz bu gün imzalanması da təsadüfi deyil. Hər kəs anlamalıdır ki,  Ermənistanda kimin nə yaratmasından, ona nə vəd edilməsindən  asılı olmayaraq regionda proseslər məhz beynəlxalq normalar çərçivəsində, Azərbaycanın  maraqlarına uyğun şəkildə getməlidir, inşallah gedəcək də!"