Paşinyan Azərbaycan tərəfi ilə uzlaşmağa doğru addımlar atacaq

Türkiyənin Cənubi Qafqazda rolunun artması, onun regionda möhkəmlənməsi şimal qonşumuzu ciddi şəkildə narahat etməkdədir.

Türkiyənin Cənubi Qafqazda rolunun artması, onun regionda möhkəmlənməsi şimal qonşumuzu ciddi şəkildə narahat etməkdədir. Xüsusilə, Azərbaycan Prezidenti İlham Əliyevlə Türkiyənin dövlət başçısı Rəcəb Tayyib Ərdoğan arasında imzalanmış Şuşa bəyannaməsi Kreml üçün soyuq duş effekti olub desək yanılmarıq. Bəyannməni Bakıdan geri qayıdarkən jurnalistlərə şərh edən Türkiyə prezidenti Rəcəb Tayyib Ərdoğan sənəddə dolayisiyla Azərbaycanda hərbi baza yaradılması mümkünlüyünün də əksini tapdığını dilə gətirib. Elə Rusiyanı da əsas narahat edən demək olar ki, bu məsələdir. Türkiyənin NATO üzvü olmasını nəzərə alan Rusiya indi Cənubi Qafqazda daha çox möhkəmlənmək istəyir.  Elə Ermənistanın istəyi ilə Rusiya qoşunlarının Azərbaycanla sərhədə gəlməsi də əslində həm regionda möhkəmlənmək, həm də bir növ Türkiyəyə cavab vermək mənası daşıyır. Elə siyasi şərhçi Elman Vəliyev də bu fikirdədir. O deyib ki, Ermənistan tərəfi sərhədə Rusiya qoşunlarının gəlməsini bildirib: "Rusiyanın da ürəyincədir Ermənistan tərəfinin bu davranışları. Rusiya bu məsələni yumşaq siyasətlə həyata keçirmək niyyətindədir. Yəni hər iki tərəfin razılığı əsasında. Ermənistan tərəfinin belə məlumat yaymasından sonra Rusiya xarici işlər naziri Lavrovla Azərbaycan xarici işlər naziri Bayramov arasında telefon danışığı olub. Görünən odur ki, danışıqlar müəyyən qədər axarında olmayıb. Nazirlərin danışığından sonra isə Azərbaycan prezidenti İlham Əliyevlə Rusiya prezidenti Putin arasında da telefon danışığı baş tutub".

Elman Vəliyev bildirib ki, Rusiya bölgədən təcrid olunması ilə üzləşməkdən nigarandır: "Türkiyə prezidenti R.T.Ərdoğanın Qarabağa gəlməsi, ikitərəfli hərbi müqavilə bağlaması, həmçinin qərbin və Amerikanın da bölgədə yer almaq niyyəti Rusiyada narahatlıq hissi yaradıb. Qərb yönümlü Paşinyanın qalib gəlməsi və xalqın qərbə meyil etməsi də Rusiyadakı bu narahatlığı daha da artırır. Ona görə əl-ayağa düşüb. Hər iki tərəf arasındakı gərginliyin nizamlanmasını istəmir. Bəhanə kimi də Rusiya qüvvələri bölgədən çıxarsa, sabitlik pozulacaq, konflikt yenidən alovlanacaq deyə düşünüb, diktə edir.

Əlbəttə ki, bu Rusiyanın əlində saxladığı bir kartdır. Və vaxtı-vaxtında istifadə etməyə səy göstərir". Siyasi şərhçi güman edir ki, prezidentlərin telefon danışığında sərhəd məsələsi, dəhliz məsələsi yer alıb: "Dəhlizin açılmasında Rusiya da maraqlıdır. Hesab edir ki, bu dəhlizin təhlükəsizliyini özü təmin etməlidir. Rusiya tərəfinə çox güzəştlər getmək gələcəkdə başağrısı ola bilər. Elə siyasət yeritmək lazımdır ki, sülhməramlılara ehtiyac qalmasın və Rusiya da bunu anlasın. Ehtimal edirəm ki, növbəti dəfə seçkilərdə qalib gələn Paşinyan Azərbaycan tərəfi ilə uzlaşmağa doğru addımlar atacaq"..

Elman Vəliyev Ərdoğanla Putinin nəzərdə tutulan görüşünə də toxunub. Bildirib ki, bu görüşdə Qarabağ məsələsi də yer alacaq: "Danışıqlarda iki tərəfdən başqa tərəflərin bölgədə yer almasına ehtiyac olmadığı da bildiriləcək. Diqqət etsək, görərik ki, ikili münasibətlər gedir. Azərbaycan tərəfi Türkiyəni Qarabağda görmək istəyir, Ermənistan tərəfi də Rusiyanı yaxın bilir. Ermənistan tərəfi əzəldən Rusiyanın himayəsində idi və elə onu müdafiə edən də Rusiyadır. Belə addımlar atması doğrudur. Ermənistanda seçkilərdən sonra Moskvada üçtərəfli bir görüşün ola biləcəyini də ehtimal edirəm. Rusiya çalışacaq ki, tərəflərin razılığı ilə bölgədə "sülhə nəzarət edici funksiyasını" həyata keçirsin. Azərbaycan öz sərhədlərini öz hesabına qorumaq imkanına malikdir. Düşünmürəm ki, əleyhimizə olası bir işə prezident İlham Əliyev razılıq verə. Meydanlarda qalib gəldik, diplomatiyada da qalib olmaq lazımdır və olacağıq da!".

Füzuli