Ermənistanın Azərbaycana təcavüzü ilə bağlı nəşrlərin təqdimatı keçiriləcək

Elmin İnkişafı Fondu Ermənistanın Azərbaycana təcavüzü və ərazi iddiaları ilə bağlı nəşrlərin təqdimatını keçirəcək. Fondun mətbuat xidmətindən "OLAYLAR"-a bildirilib ki, Fond və UNESCO üzrə Azərbaycan Respublikasının Milli Komissiyasının 2-ci "Şuşa qrantı" birgə müsabiqəsinin qalibi olmuş qrant layihələri çərçivəsində nəşr olunmuş "Ermənistanın Azərbaycana təcavüzü" adlı 3 cildlik kitabın və "Ermənistanın sovetləşməsindən Azərbaycan ərazilərinin işğalınadək erməni iddiaları: tarix - olduğu kimi (1920-1994-cü illər)" monoqrafiyasının təqdimat mərasimi martın 31-də baş tutacaq. Tədbirdə dövlət və hökumət strukturlarının, akademik və təhsil qurumlarının, ictimai birlik və qeyri-hökumət təşkilatlarının, KİV-lərin nümayəndələri iştirak edəcək. Tədbirin keçirilməsinə Azərbaycan Respublikasının Prezidenti yanında Dövlət İdarəçilik Akademiyası və "Azərbaycan Respublikası Dağlıq Qarabağ bölgəsinin azərbaycanlı icması" İctimai Birliyi təşkilati dəstək göstərir.

Təklifinizi, şikayətinizi bizə yazın. Sizi dinlərik. 055 634 88 31