Bakı Uşaq Teatrı festivallarda uğurla təmsil olunur
Bakı Uşaq Teatrının Türkiyənin EKsanat teatrı ilə birlikdə pilot layihə olan "Türk Xalqlarının Teatrı" layihəsi çərçivəsində İntiqam Soltanın quruluşunda "Sıravi Dursun" tamaşasının təqdimatı dekabr ayında Bakı şəhərində uğurla reallaşdı. Layihənin II mərhələsində tamaşanın Türkiyədə nümayişi nəzərdə tutulurdu. Bakı Uşaq Teatrı 19-26 iyun tarixlərində Türkiyə Respublikasında qastrol səfərində olub. Türkiyənin Gerze, Bulancaq, Merzifon, Samsun, Sinop, Girəsun kimi şəhərlərində "Sıravi Dursun" tamaşasının nümayişi çox uğurla keçib. Bu haqda "OLAYLAR"a Bakı Uşaq Teatrının mətbuat xidmətindən məlumat verilib. Səfər zamanı Türkiyənin adı çəkilən şəhərlərinin Bələdiyyə Başkanları və teatrın direktoru, eləcə də tamaşanın quruluşçu rejisoru ilə İntiqam Soltan arasında rəsmi görüşlər keçirilərək gələcəkdə də iki qardaş ölkə arasında belə layihələrin həyata keçirilməsinin zəruri oloduğu vurğulanıb. Türkiyə tərəfindən bu tamaşalara görə Mədəniyyət və Turizm Naziri Əbülfəs Qarayev və Bakı şəhəri İcra hakimiyyətinin başçısı Hacıbala Abutalıbova təşəkkür məktubu ünvanlanıb.
Qeyd edək ki, "Sıravi Dursun" tamaşasının 6 iyun saat 12:00-da teatrın müvəqqəti yerləşdiyi Qaraçuxur qəsəbəsi Q.Abbasov adına mədəniyyət evində nümayişi nəzərdə tutulur.
26-30 iyun tarixlərində isə Bakı Uşaq Teatrı Gürcüstan Respublikasının Batumi şəhərində keçirilən "Beynәlxalq dostluq festivalı "Harmoniya 2013" festivalında çox uğurla çıxış edib. 2-8 iyun tarixlərində isə Bakı Uşaq Teatrının nəzdində fəaliyyət göstərən "Günay" teatr studiyası Macarıstan Respublikasında keçirilən festivalda iştirakı da nəzərdə tutulur. Hal-hazırda Macarıstanda səfərdə olan studiya festivalda "Dərviş Məstəli Şah" və "Rusalka" tamaşaları, milli rəqslərimizlə çıxış edəcəklər. Qeyd edək ki, Bakı Uşaq Teatrı bu mövsümü böyüklər üçün İntiqam Soltanın və Hacıbaba Məmədovun quruluş verdiyi "Əşxas" (10 iyul saat 16:00), uşaqlar üçün isə İlhamə Əhmədovanın quruluşunda "Ağıllı uzunqulaq" (12 iyul saat 11:00) tamaşası ilə bağlayacaq.