Snoop Dog öz ləqəbini dəyişdi
Amerikalı reper reqqi üslubunda yeni albomunda "Snoop Lion" ləqəbilə çıxış edir
Amerikanın tanınmış reperlərindən olan Snoop Dog yeni buraxacağı albomda özünü reqqi üslubunda sınayacaq. Reper "Reincarnated" adlı yeni albomunda "Snoop Dog" ləqəbi ilə deyil, "Snoop Lion" ləqəbi ilə çıxış edir. "Buna baxmayaraq, mən həmişə Snoop Dog olaraq qalacam. Snoop Lion sadəcə Snoop Dogun inkişaf etmiş şəxsiyyətidir"-41 yaşlı reper belə deyib.
Snoop Dog reqqi üslubunda albom üzərində çalışmazdan əvvəl bu musiqinin vətəni sayılan Yamaykaya səfər edib və bu səfəri əks etdirən sənədli filmin də albomu müşayiət edəcəyini deyib. Filmdə reqqi əfsanələrindən hesab edilən Banni Veyler Snoop Dogla görüşür və ona "Dog" deyil, "Lion" ləqəbi verdiyini deyir.
Yeni albomu barədə danışan Snoop Dog artıq 20 ildir rep dediyini, indi də özünü yeni üslublarda sınamaq və bununla da pul qazanmaq deyil, əylənmək fikrində olduğunu etiraf edib.