Maykl Ceksonun öldüyü evi aldılar

Dünya popunun kralı, mərhum Maykl Ceksonun vəfat etdiyi malikanə satılıb. 20 milyon dollara satışa çıxarılmış evi 18,1 milyon dollara zəngin bank investoru Stiven Mayer satın alıb. Milli.Az TMZ-yə istinadən bildirir ki, alqı-satqı müqaviləsi hələ qüvvəyə minməsə də, Mayer ailəsi ilə birlikdə malikanəyə köçməyə başlayıb. Köçün razılaşdırıldığı bildirilir. Əks təqdirdə Mayer hüquqi risklərlə qarşılaşa bilər. Ceksonun keçindiyi malikanə ABŞ-ın Los-Anceles şəhərinin ən dəbdəbəli məkanlarından biri olan Beverli-Hillzdə, 100 North Carolwood Drive ünvanında yerləşir. Burada Beverli-Hillz və Bel Eyr "platin üçbucaq" yaradırlar. 2002-ci ildə inşa edilmiş villanın sahəsi 1600 kvadrat metrdir. Maykl Cekson villada ayı 100 min dollardan kirayədə qalırdı. O, maliyyə böhranına düşərək 2008-ci ildə məşhur rançosu Neverland-ı satandan sonra kirayədə qalmağa başlamışdı.  Maykl Cekson 2009-cu ilin iyunun 25-də 50 yaşında dünyasını dəyişmişdi.