Ölkəyə yüksək keyfiyyətli və təhlükəsiz məhsulların idxalı əsas amillərdən biridir
Artıq bir neçə ildir ki, ölkədə ərzaq təhlükəsizliyinin təmin olunması əsas prioritet vəzifələrdən birinə çevrilib. Ötən müddət ərzində bu istiqamətdə görülən işlər müsbət nəticələrin əldə olunacağından xəbər verir. Nəzərə alsaq ki, ərzaq təhlükəsizliyinin təmin olunmasında başlıca diqqət yetirilməli olan qida təhlükəsizliyi də, o zaman ölkədə istehsal olunan, eləcə də Azərbaycana idxal edilən qida məhsullarına nəzarətin gücləndirilməsi vacib elementlərdən biri hesab edilə bilər. Elə bir müddət əvvəl yaradılan Qida Təhlükəsizliyi Agentliyi də məhz bu məqsədə xidmət edir. Məlumat üçün qeyd edək ki. iyul ayının 1-dən etibarən qida zəncirinin bütün mərhələlərində, o cümlədən idxal-ixrac əməliyyatları sahəsində dövlət nəzarətini həyata keçirəcək Qida Təhlükəsizliyi Agentliyi sahibkarlıq subyektlərinin qida təhlükəsizliyinin təmin olunması prosesində iştirakına yüksək qiymət verir, sahibkarlara qida zəncirinin bütün mərhələlərində müasir tələblərə uyğun fəaliyyətlərini təşkil etmələri üçün hərtərəfli dəstək göstərəcəyini bəyan edir. Agentlik idxal-ixrac əməliyyatları ilə məşğul olan sahibkarlıq subyektlərini ilk növbədə qanunvericiliyin tələblərinə uyğun olaraq, qarşılıqlı etimad şəraitində bir sıra qaydalara əməl etməyə çağırır. Bu sırada ilk yeri dövlət baytarlıq nəzarətində olan yüklərin idxalına dair tələblər tutur. Belə ki, idxal-ixrac əməliyyatları ilə məşğul olan sahibkarlar dövlət baytarlıq nəzarətində olan yükləri ölkəyə idxal etməzdən öncə idxal tələbləri barədə məlumatlı olmalı, baytarlıq nəzarətində olan yüklər ölkəmizə göndərilməmişdən əvvəl ixrac edən ölkə tərəfindən Azərbaycan Respublikasının idxal tələbləri nəzərə alınmalıdır. Yüklərə Beynəlxalq Heyvan Sağlamlığı Təşkilatının baytarlıq sahəsində təklif etdiyi müvafiq nümunələrə uyğun ixrac və idxal edən, lazım gələrsə, tranzit ölkələrin birgə seçdiyi dildə beynəlxalq baytarlıq sertifikatı tərtib edilməlidir.
Dövlət baytarlıq nəzarətində olan yüklərin idxalını həyata keçirən sahibkarlar Azərbaycan Respublikasında qüvvədə olan süd və süd məhsullarına, ət və ət məhsullarına, konservlərə, ərzaq balıqları, dəniz məhsulları, habelə kəsim üçün iri buynuzlu heyvanlara, quş ətinə və digər baytarlıq nəzarətində olan məhsulların idxalına dair baytarlıq tələbləri ilə Agentliyin rəsmi veb səhifəsində tanış ola biləcəklər.
Azərbaycan Respublikasında qüvvədə olan baytarlıq-sanitariya tələblərinə uyğun olmayan dövlət baytarlıq nəzarətində olan yüklərin ölkəyə idxalı yol verilməzdir.
Sahibkarların diqqət yetirməli olduğu digər mühüm tələb emal olunmuş məhsulların idxalına dair tələblərdir. Belə ki, Azərbaycan Respublikasına idxal olunan qida məhsullarının hər partiyasının daşıdığı risk səviyyəsinə uyğun olaraq ekspertizaları aparılır və nəticələrinə uyğun olaraq qida təhlükəsizliyi sertifikatı verilir. Sertifikatın verilməsi üçün sertifikatlaşdırılacaq məhsulun mənşə sənədi, alqı-satqı müqaviləsi, idxal ediləcək məhsula dair hesab-faktura (invoys) və idxal olunan məhsulun növündən asılı olaraq ixracatçı ölkənin səlahiyyətli dövlət qurumu tərəfindən verilmiş yeyinti məhsulunun təhlükəsizliyini təsdiq edən sənədlər tələb edilir. Baytarlıq preparatlarının idxalına dair tələblərə də sahibkarlar diqqət yetirməlidir. Azərbaycan Respublikasının Qida Təhlükəsizliyi Agentliyi tərəfindən dövlət qeydiyyatına alınmış, sertifikatlaşdırılmış, qeydiyyat şəhadətnaməsinə malik və keyfiyyət sertifikatı (şəhadətnaməsi) ilə təmin edilmiş baytarlıq preparatlarının idxalına icazə verilir. Pestisidlərin, bioloji preparatların və aqrokimyəvi maddələrin idxalına dair tələblərə gəlincə, Azərbaycan Respublikasının Qida Təhlükəsizliyi Agentliyi tərəfindən dövlət qeydiyyatına alınmış, istifadəsinə icazə verilmiş preparatlar siyahısına daxil edilmiş, mənşəyi və keyfiyyəti barədə sertifikatları olan və müvafiq qaydada qablaşdırılmış və etiketləşdirilmiş pestisidlər və bioloji preparatların idxalına icazə verilir.
Qida Təhlükəsizliyi Agentliyi bəyan edir ki, əhalinin sağlam qida məhsulları ilə təmin olunması üçün daxili və beynəlxalq bazarlarda istehlakçıların ehtiyaclarına cavab verən yüksək keyfiyyətli və təhlükəsiz məhsulların idxalı əsas amillərdən biridir.
Süleyman