Həkimlər Şumaxerdə ağciyər infeksiyası aşkar ediblər

Fransadakı həkimlər "Formula-1" yarışları üzrə 7 qat dünya çempionu Mixael Şumaxerə ağciyər infeksiyası diaqnozu qoyublar. Trend-in çərşənbə günü "İnterfaks"a istinadən verdiyi məlumata görə, iltihabın qarşısını tezliklə almaq üçün M.Şumaxerə hazırda antibiotiklər vurulur. Məlumata görə, idmançının komadan çıxarılması prosesinin dayandırılıb-dayandırılmadığı hələ məlum deyil.
 
Qeyd edək ki, ötən il dekabrın 29-da Fransanın Meribel kurort şəhərində xizəklə sürüşən M.Şumaxer yıxılaraq ağır kəllə beyin travması alıb. Alman pilot 45 yaşını Qrenobldakı hospitalda komada "qeyd edib".