"Tottenhem"in qapıçısı PSJ-nin hədəfində

Fransanın PSJ klubu mövsümün sonunda qapıçı mövqeyini gücləndirməyi planlaşdırır. Qol.Az-ın Fransa mətbuatına istinadən verdiyi məlumata görə, Paris təmsilçisi "Tottenhem"in qolkiperi Hüqo Lorisi transfer etmək istəyir. PSJ-nin baş məşqçisi Loran Blan yeni mövsümdən 27 yaşlı qapıçını komandasında görmək istəyir. Lorisin daha öncə verdiyi "hədəfimiz Çempionlar Liqasında oynamaqdır. Əgər bunu bacarmasaq, o zaman komandadan ayrıla bilərəm" açıqlamaları da PSJ-ni ümidləndirib. PSJ klubunun fransız qolkiperin transferi üçün qarşı tərəfə 20 milyon avro ödəyəcəyi iddia olunur.

Qeyd edək ki, Loris ötən mövsümün sonunda 12,5 milyon müqabilində "Lion"dan "Tottenhem"ə transfer edilmişdi.