Bakıda Avropa çempionatı ilə bağlı görüş olacaq

2020-ci il Avropa çempionatına ev sahibliyi ilə bağlı Gürcüstan Futbol Federasiyası (GFF) və AFFA rəhbərliyi arasında iyunun 1-də Batumidə keçirilmiş görüşün nəticəsi olaraq hər iki federasiyanın prezidentləri baş katiblərə İşçi Qrupun tərkibinin müəyyənləşdirilməsi və müvafiq hazırlıq işlərinin təşkilini tapşırıb. Lent.az-ın AFFA-nın rəsmi saytına istinadən verdiyi məlumata görə, bu görüşdən sonra hər iki federasiya arasında bir necə işçi telekonfranslar keçirilib.
İyulun 5-də isə Bakıda AFFA və GFF-nin baş katiblərinin görüşü nəzərdə tutulub.
Qeyd edək ki, iyunun 30-da Ukraynanın paytaxtı Kiyevdə UEFA İcraiyyə Komitəsinin növbəti iclası keçiriləcək. Toplantıda mümkun namizədlər, Avro-2020-nin ev sahibliyi ilə bağlı tenderə hazırlıq işləri və sifariş sənədlərinin təsdiq şərtləri müzakirə olunacaq. İclasdan bir necə gün sonra Avro-2020-nin ev sahibliyinə namizəd assosiasiyalara turnirin keçirilməsi ilə bağlı tenderdə iştirak şərtləri əks olunmuş bütün müvafiq sənədlər göndəriləcək. Tenderdə iştirakla bağlı sənədlər alınacağı təqdirdə iki federasiyanın birgə İşçi Qrupu yaradılacaq.