Bakıda möhtəşəm konsert və möhtəşəm oyunlar

Sabah Azərbaycanda keçirilən 17 yaşadək qızlar arasında dünya çempionatına yekun vurulacaq.
Apasport.az saytının məlumatına görə, yarışın son günündə 2 görüş baş tutacaq.
Bakıda keçiriləcək görüşlərdə əvvəl bürünc medalların sahibi müəyyənləşəcək. Qrup mərhələsində üz-üzə gələn Almaniya və Qana növbəti dəfə münasibətlərini ayırd edəcəklər. DÇ-2008-də də, 20 gün əvvəlki görüşdə də qalib gələn Bundestim Azərbaycanı mükafatsız tərk etməmək üçün Afrika təmsilçisini növbəti dəfə məğlub etməlidir.
Çempionun adına isə Fransa və KXDR arasında matçda aydınlıq gələcək. Qrupdakı matçda qalibi müəyyənləşdirə bilməyən rəqiblər bu dəfə mütləq kimin güclü olduğunu aydınlaşdırmalıdırlar. Əvvəlki 2 mundialda final 90 dəqiqəyə bitməyib ki, yenidən əlavə vaxt və ya penaltilər seriyasının olacağı istisna deyil.

Qeyd edək ki, final oyunları tanınmış müğənni Şakiranın konserti ilə də əlamətdar olacaq. İspaniya milli komandasının və "Barselona" klubunun futbolçusu Herard Pikenin sevgilisi olan xanım Tofiq Bəhramov adına Respublika stadionunda oxuyacağı mahnılarla azarkeşləri coşduracaq.

17 yaşadək qızlar arasında dünya çempionatı
13 oktyabr

III yer uğrunda oyun
17:00. Qana - Almaniya
Baş hakim: Yana Adamova (Çexiya)
Baki. Tofiq Bəhramov adına Respublika stadionu

Final
20:00. Fransa - KXDR
Baş hakim: Karina Vitulano (İtaliya)
Baki. Tofiq Bəhramov adına Respublika stadionu