İrakli Kobaxidze: Gürcüstan-Ermənistan əməkdaşlığının dərinləşdirilməsi vacibdir – ÖZƏL

Olaylar.az xəbər verir ki, Gürcüstanın Baş naziri İrakli Kobaxidze erməni həmkarı Nikol Paşinyan ilə birgə brifinqdə bildirib ki, regionda mürəkkəb vəziyyət fonunda iki ölkə arasında əməkdaşlığın daha da dərinləşdirilməsi xüsusi əhəmiyyət daşıyır.

Onun sözlərinə görə, Tbilisidə Gürcüstan və Ermənistan arasında iqtisadi əməkdaşlıq üzrə Hökumətlərarası Komissiyanın 15-ci iclası keçirilib və tərəflər siyasi, iqtisadi, təhsil, mədəniyyət və idman sahələrində əməkdaşlığı müzakirə ediblər.

Kobaxidze vurğulayıb ki, yüksək əməkdaşlıq səviyyəsinə baxmayaraq, bütün istiqamətlər üzrə inkişaf potensialı mövcuddur. Ermənistan Gürcüstanın əsas ticarət tərəfdaşlarından biridir və ticarət dövriyyəsinə görə ilk onluqda yer alır. Turizm sahəsində isə Ermənistan Gürcüstana ən çox ziyarətçi göndərən ölkələr arasında üçüncü yerdədir.

Baş nazir Ermənistanın Gürcüstanın suverenliyi və ərazi bütövlüyünə, eləcə də BMT-nin məcburi köçkünlərlə bağlı qətnaməsinə verdiyi dəstəyə görə təşəkkür edib.

Kobaxidze həmçinin Ermənistan və Azərbaycan arasında imzalanmış tarixi sülh sazişini alqışlayaraq bildirib ki, bu, regionda sabitliyin möhkəmlənməsi üçün mühüm zəmin yaradır. O, Gürcüstanın bölgədə sülh və sabitliyə töhfə vermək üçün bütün səylərini davam etdirəcəyini qeyd edib.