İrana zərbələrin yeni mərhələsi daha ağır olacaq - Rubio

İrandakı əməliyyatın növbəti mərhələsi daha ağır olacaq.Musavat.com xəbər verir ki, bunu ABŞ Dövlət Katibi Marko Rubio deyib: "Taktiki səylərimizin təfərrüatlarını açıqlamayacağam, amma Amerika ordusunun hələ vurmadığı ən ağır zərbələri qarşıdadır. Növbəti mərhələ İrana indikindən daha sərt olacaq".

Rubio qeyd edib ki, Vaşinqton "İranın radikal şiə ruhaniləri tərəfindən idarə olunmamasını" istəsə də, həmin ölkədəki hərbi əməliyyatın əsas məqsədi rejim dəyişikliyi deyil: "Bu əməliyyatın məqsədi onların ballistik raket potensialını məhv etmək və onu yenidən qura bilməmələrini təmin etməkdir".

ABŞ Dövlət Katibi bu məqsədə quru qüvvələrindən istifadə etmədən nail olmağın mümkün olduğunu irəli sürsə də, İranda quru əməliyyatının mümkünlüyünü istisna etməyib: "Aydındır ki, prezidentin bu variantları var. O, heç vaxt heç nəyi istisna etməyəcək".

Dövlət Departamentinin rəhbəri həmçinin ABŞ-ın İrana qarşı hücumlarını özünümüdafiə ilə əlaqələndirib: "Əgər biz onlara zərbə endirmədən əvvəl İran hücumunun baş verməsini gözləsəydik, daha böyük itkilər verərdik. Biz İsrailin hərəkətə keçəcəyini bilirdik. Biz bilirdik ki, bu, Amerika qüvvələrinə hücumu sürətləndirəcək. Və biz bilirdik ki, əgər onlar bu hücumları başlamazdan əvvəl qabaqlayıcı tədbirlər görməsək, böyük itkilər verərdik".

Rubio həmçinin bu gün ABŞ-ın neft qiymətlərinin kəskin artımını azaltmağa yönəlmiş bir proqram həyata keçirməyə başlayacağını vurğulayıb.