Qazaxıstanda “Epşteyn işi” ilə bağlı araşdırma başlanıb – sənədlərdə keçmiş baş nazirin adı var

Qazaxıstanın Baş Prokurorluğu keçmiş məmurlarla mərhum amerikalı maliyyəçi Ceffri Epşteyn arasında mümkün əlaqələrlə bağlı araşdırma başladıb.

Olaylar.az Tengrinews.kz saytına istinadla xəbər verir ki, bu barədə ölkənin baş prokuroru Berik Asılov jurnalistlərə bildirib.

İki gün öncə Qazaxıstan parlamentinin üzvü Asxat Rəhimcanov prokurorluqdan və təhlükəsizlik xidmətlərindən keçmiş yüksək vəzifəli məmurlarla Epşteyn arasında mümkün əlaqələr barədə məlumatları araşdırmağı, eləcə də onun Qazaxıstana səfərləri ilə bağlı mediada yayılan məlumatları nəzərdən keçirməyi xahiş edib.

Rəhimcanovun sözlərinə görə, keçmiş baş nazir və Milli Təhlükəsizlik Komitəsinin keçmiş sədri Kərim Məsimovun adı "sənədlərdə ən azı səkkiz dəfə qeyd olunur".

Deputat bildirib ki, sənədlər açıq şəkildə göstərir ki, Epşteyn və Məsimov şəxsən tanış olublar. O, həmçinin deyib ki, sənədlərdə Epşteynin keçmiş Milli Bank rəhbəri Kayrat Kelimbetovla birlikdə tətil etməsi qeyd olunur.

"Deputat yalnız sorğu verib, lakin buna baxmayaraq, bütün dünya bu məsələni müzakirə edir. Buna görə də, biz hüquq-mühafizə orqanları olaraq bu faktları nəzərdən keçirir və yoxlayırıq", - Berik Asılov bildirib.

Jurnalistin Kərim Məsimovla bağlı sualına cavab olaraq baş prokuror ilkin istintaqın aparıldığını təsdiqləyib.

"İlkin istintaq başlayıb. Deputat Epşteynin Qazaxıstana səfər edib-etmədiyini soruşur. Bu istintaq artıq davam edir. Kelimbetovun özünün ora səfər edib-etməməsi əlavə araşdırılacaq", - o bildirib.

Keçmiş baş nazir Kərim Məsimov 2023-cü ilin aprelində dövlətə xəyanət, hakimiyyəti zorla ələ keçirməyə cəhd və hakimiyyətdən və vəzifə səlahiyyətlərindən sui-istifadə ittihamları ilə 18 il müddətinə həbs cəzasına məhkum edilib.