"Nə BMT, nə də Fransa bunu bacarmaz" – ABŞ Ukrayna danışıqlarında liderliyini elan etdi

ABŞ-ın Dövlət katibi Marko Rubio Ukraynadakı müharibənin nizamlanmasında Vaşinqtonun müstəsna və əvəzedilməz rolunu bir daha bəyan edib. Rubio bildirib ki, Amerika Birləşmiş Ştatları hazırda dünyada hər iki tərəfi - həm Rusiya, həm də Ukrayna nümayəndələrini eyni masa arxasına gətirməyə müvəffəq olan yeganə qüvvədir.

Dövlət katibi vurğulayıb ki, Vaşinqtonun bu vasitəçilik missiyasından imtina etməsi sülh prosesinin tamamilə çökməsi demək olar:

"Biz dünyada Rusiya və Ukrayna danışıqçılarını bir masa arxasına oturtmağı və dialoqa başlatmağı bacaran yeganə subyektik. Bu qədər dəhşətli və dağıdıcı müharibə üçün bu, fövqəladə dərəcədə vacib roldur və biz ondan imtina etmək istəmirik. Çünki biz geri çəkilsək, bu boşluğu kim doldura bilər?"

Rubio çıxışında beynəlxalq təşkilatların və Avropa ölkələrinin bu məsələdəki acizliyinə də toxunub:

BMT: "Birləşmiş Millətlər Təşkilatı bunu edə bilməz".

Fransa: "Fransa da bu rolu öhdəsinə götürmək iqtidarında deyil".

Avropa İttifaqı: "Avropa İttifaqı da bu funksiyanı yerinə yetirə bilməz - Rusiya tərəfi onlarla heç dialoq belə aparmır".

ABŞ-ın baş diplomatı müharibənin gedişatı ilə bağlı mühüm bir reallığı da etiraf edib. O bildirib ki, Ukrayna böhranının sonu döyüş meydanında deyil, məhz danışıqlar masasında müəyyənləşəcək: "Biz başa düşürük ki, nəticədə bu krizisin hərbi həlli yoxdur. Müharibə danışıqlar masasında bitəcək".

Rubionun bu bəyanatı Cenevrədə ABŞ, Rusiya və Ukrayna nümayəndə heyətləri arasında keçirilən üçüncü raund danışıqlar fonunda xüsusi çəki qazanır. Donald Tramp administrasiyasının "sülh üçün 15 günlük" ultimatumu və Cared Kuşnerin prosesə cəlb olunması Vaşinqtonun bu məsələdə nə qədər iddialı olduğunu göstərir.

Xatırladaq ki, fevralın 18-də baş tutan əvvəlki görüşlərdə yalnız hərbi məsələlər və atəşkəsin monitorinqi üzrə irəliləyiş əldə olunmuşdu. Rubio isə daha böyük siyasi razılaşmanın hələ də masada olduğunu mesaj verir.