Medvedev: Ukraynadakı münaqişə vətəndaş qarşıdurmasının bir formasıdır -ÖZƏL 

Rusiya Təhlükəsizlik Şurası sədrinin müavini Dmitri Medvedev Ukraynadakı münaqişənin SSRİ-nin dağılmasının nəticəsi olduğunu və mahiyyət etibarilə vətəndaş qarşıdurmasının bir forması sayıldığını bildirib. Olaylar.az xəbər verir ki, bu barədə Medvedev TASS, Reuters və Wargonzo layihəsinə verdiyi müsahibədə danışıb. Onun sözlərinə görə, münaqişənin kökündə Sovet İttifaqının süqutundan sonra yaranan dərin siyasi və tarixi parçalanma dayanır.
"Bu, Sovet İttifaqının dağılması nəticəsində baş verən dəhşətli parçalanmanın nəticəsidir. Əslində, bu gün müşahidə etdiyimiz proses vətəndaş qarşıdurmasının çevrilmiş formasıdır", - deyə Medvedev qeyd edib.
O, Rusiya ilə Ukrayna arasında mövcud olan dərin tarixi və ailə bağlarına da diqqət çəkib. Medvedev bildirib ki, bu əlaqələr çox dərindir və bir çox ailələrdə rusla ukraynalını ayırmaq belə çətindir.
"Bu, hamımızın daxilində dərin iz buraxıb. Mənim də həmin bölgələrdə yaşamış qohumlarım olub. Kim rusdur, kim ukraynalı - bunu ayırd etmək çox çətindir", - deyə o əlavə edib.