ABŞ-Ukrayna danışıqları: Floridada keçirilən görüşdə bütün məsələlər üzrə yekun qərar qəbul edilməyib – ÖZƏL
Ukrayna və ABŞ nümayəndələrinin Floridada keçirilən danışıqları bütün məsələlər üzrə yekun qərarların qəbulu ilə nəticələnməyib və hələ çox iş görülməlidir.
Olaylar.az xəbər verir ki, bu barədə CNN telekanalı mənbəyə istinadən məlumat yayıb.
"Hələ çox iş görülməli olduğu üçün, yekun qərar əldə etdiyimizi söyləmək tez olardı...", - deyə mənbə bildirib.
Qeyd olunur ki, danışıqlar zamanı nizamlanma planının ən problemli aspektləri ətraflı şəkildə müzakirə edilib.
Ukrayna Milli Təhlükəsizlik və Müdafiə Şurasının (MTMŞ) katibi Rüstəm Umerov, Ukrayna tərəfini təmsil edən heyətin rəhbəri olaraq, bazar günü ABŞ nümayəndələri ilə Floridada görüşə başladıqlarını bildirmişdi.
Daha əvvəl Volodimir Zelenski, vəzifəsindən azad edilmiş Andrey Yermakın yerinə, Umerovu ABŞ, Ukraynanın tərəfdaşları, eləcə də Rusiya ilə danışıqlar prosesində iştirak edəcək nümayəndə heyətinin rəhbəri təyin etmişdi. Nümayəndə heyətinin tərkibinə Ukrayna Silahlı Qüvvələrinin Baş Qərargah rəisi Andrey İqnatov, Xarici İşlər Nazirliyi və kəşfiyyat nümayəndələri də daxil idi.
ABŞ administrasiyası daha əvvəl Ukrayna münaqişəsinin nizamlanması üzrə bir plan hazırladığını, lakin iş davam etdiyi üçün onun detallarını hələ ki müzakirə etməyəcəyini bildirmişdi. Kremlin bəyanatına görə, Rusiya danışıqlara açıq qalır və Ankoric platformasında müzakirələrə davam edir.
Rusiya prezidenti Vladimir Putin noyabrın 21-də Təhlükəsizlik Şurasının iclasında çıxışı zamanı ABŞ planının yekun sülh nizamlanmasının əsası ola biləcəyini, lakin bu mətnin hazırda Rusiya ilə konkret müzakirə edilmədiyini söyləyib. Onun fərziyyəsinə görə, bu, ABŞ administrasiyasının Kiyevin razılığını ala bilməməsi ilə bağlıdır, çünki Ukrayna və onun Avropalı müttəfiqləri hələ də illüziyalardadırlar və döyüş meydanında Rusiyaya "strateji məğlubiyyət" yaşatmağı xəyal edirlər. Putin qeyd edib ki, onların mövqeyi döyüş meydanında real vəziyyət haqqında obyektiv məlumatın olmaması ilə əlaqədardır.