Qəzzada gecə cəhənnəmə çevrildi- İsrail eyni anda şimal, cənub və mərkəzi vurur

İsrail ordusu Qəzza zolağının müxtəlif bölgələrinə yenidən genişmiqyaslı hava zərbələri endirib. Eyni zamanda İsrail qüvvələri İordan çayının Qərb Sahilində də reydlər həyata keçirir.

Musavat.com "Al Jazeera"yə istinadən xəbər verir ki, İsrail Hərbi Hava Qüvvələri Burayc qaçqın düşərgəsinin yaxınlığındakı "sarı xəttin" o tayında yerləşən əraziləri bombalayıb. Bu, Qəzzanın mərkəzi hissəsində gərginliyin daha da artmasına səbəb olub.

Bununla paralel olaraq İsrail qırıcıları Rəfahın şərq hissəsini, həmçinin Xan Yunisin şərqində yerləşən mövqeləri vurub. Qeyd olunur ki, İsrail quru qüvvələri bu bölgədə partlayıcı işlər və dağıdıcı əməliyyatlar aparır.

Fələstin media resursu "Quds" bildirir ki, İsrail aviasiyası Qəzzanın şimalındakı Cəbaliya bölgəsini, cənubda isə Moraq ətrafını bombardman edib.

Zərbələrin nəticələri, dağıntıların miqyası və ölən-yaralananlarla bağlı məlumatlar dəqiqləşdirilir. Qəzza zolağında humanitar vəziyyət onsuz da kritik idi və son hücumlar durumun daha da ağırlaşmasına səbəb olub.