Çin Xarici İşlər Nazirliyi Kanada xarici işlər nazirinin oktyabrın 16-17-də səfərini təsdiqləyib - ÖZƏL 

Kanada Xarici İşlər Naziri Anita Anand oktyabrın 16-17-də Çin Xalq Respublikasına rəsmi səfər edəcək. Olaylar.az xəbər verir ki, bu barədə Çin Xarici İşlər Nazirliyinin rəsmi nümayəndəsi Lin Jian məlumat verib. Səfərin dəvəti Çin Kommunist Partiyasının Mərkəzi Komitəsinin Politbüro üzvü və Çin Xarici İşlər Naziri Van İ tərəfindən göndərilib. Lin Jian bildirib ki, bu, Anandın may ayında vəzifəyə başladıqdan sonra Çinə ilk səfəridir.
Rəsmi şəxsin sözlərinə görə, səfər zamanı tərəflər Çin-Kanada münasibətləri və qarşılıqlı maraq doğuran beynəlxalq və regional məsələlər üzrə dərinləşdirilmiş danışıqlar aparacaq. Lin Jian həmçinin xatırladıb ki, bu il Çin və Kanada arasında diplomatik əlaqələrin qurulmasının 55-ci ildönümü və strateji tərəfdaşlığın təsis edilməsi qeyd olunur. Çin tərəfi iki ölkə arasında qarşılıqlı hörmət və fayda əsasında münasibətlərin inkişaf etdirilməsini dəstəkləyir. Çin hakimiyyəti strateji əməkdaşlığı gücləndirmək niyyətindədir və səfər zamanı yüksək səviyyədə əldə olunmuş konsensusların praktikada həyata keçirilməsinə çalışacaq. Lin Jian əlavə edib ki, belə əməkdaşlıq hər iki ölkənin xalqına fayda gətirəcək.
Qeyd edək ki, The Globe and Mail qəzeti xəbər verib ki, Kanada Xarici İşlər Naziri Çinə səfər edərək davam edən ticarət münaqişəsi fonunda münasibətləri yaxşılaşdırmağa çalışacaq. 2024-cü ildə Ottava Çin istehsalı elektrik avtomobillərinə 100%, polad və alüminium idxalına isə 25% rüsum tətbiq etmişdi. Mart ayında isə Çin Kanadadan idxal olunan kolza yağına 100% rüsum qoyub, daha sonra isə 75,8% səviyyəsində anti-dempinq depozitləri tətbiq edərək kanadalı fermerlərə mənfi təsir göstərib.