Bu, ABŞ üçün fəlakət olacaq – Vaşinqton rəsmisi

Ali Məhkəmə Vaşinqtonun digər ölkələrə tətbiq etdiyi rüsumların bir çoxunun qeyri-qanuni olduğuna dair əvvəlki qərarını ləğv etməsə, Birləşmiş Ştatlar fəlakətlə üzləşəcək.

Musavat.com xəbər verir ki, bunu ABŞ Ticarət Nümayəndəsi Ceymison Grir Fox News-a müsahibəsində deyib: "Bu davada qalib gəlmək bizim üçün inanılmaz dərəcədə vacibdir. Əgər uduzsaq, bu, ölkə, xəzinə və danışıqlarımız üçün fəlakətli olacaq".

Sentyabrın 4-də Donald Tramp administrasiyası Ali Məhkəmədən ABŞ-ın Kolumbiya dairəsi üzrə Apellyasiya Məhkəməsinin avqustun 29-da çıxardığı hökmü ləğv etməyi xahiş edib. Məhkəmə Trampın elan etdiyi bir çox tarifləri tətbiq etmək səlahiyyətinin olmadığını müəyyən edib. Vaşinqton administrasiyası hesab edir ki, apellyasiya məhkəməsinin qərarı ticarət məsələləri üzrə "digər ölkələrlə davam edən danışıqlarla bağlı qeyri-müəyyənlik yaradır" və mövcud razılaşmaları "təhlükə altına alır".

İş bir qrup biznes nümayəndəsinin ABŞ hökumətinə qarşı iddia qaldırmasından sonra başlayıb. Sahibkarlar Vaşinqtonun tətbiq etdiyi tariflərin qeyri-qanuni olduğunu və şirkətlərinə zərər vurduğunu iddia ediblər.