Yaponiyada nadir rəngli Şimal İşıqları alimləri təəccübləndirdi- ÖZƏL

Olaylar.az xəbər verir ki, 11 may 2024-cü ildə Yaponiyanın Honşu və Hokkaydo adalarının sakinləri nadir təbii hadisənin - qeyri-adi mavi rəngli şimal işıqlarının şahidi olublar.

Adətən, aşağı en dairələrində müşahidə olunan şimal işıqları oksigen atomlarının parlaması səbəbindən qırmızı rəngdə olur. Lakin bu dəfə qeyri-adi mavi çaları alimlərin diqqətini çəkib. Bu fenomen 1200 kilometr uzunluğunda bir ərazini əhatə edib və 400-900 kilometr hündürlüklərdə, Yer kürəsinin maqnit xətləri boyunca müşahidə olunub. Bu, ilk dəfə qeydə alınan belə bir hadisədir.

Nagoya Universitetinin tədqiqatçıları, İsveç Kosmik Fizika İnstitutunun alimləri ilə birgə, hadisəni araşdırıblar. Aparılan ilkin araşdırmalara görə, bu nadir mavi rəng azot ionlarının naməlum bir mexanizmlə sürətlənməsi nəticəsində yarana bilər.

Nagoya Universitetindən professor Kazuo Siokavanın fikrincə, bu müşahidə atmosferdə hələ bilinməyən bir prosesin mövcudluğunu göstərir və daha dərindən araşdırılmalıdır.

Bu cür hadisələrin araşdırılması, atmosferin yuxarı təbəqələrində baş verən prosesləri və onların maqnit qasırğalarına təsirini daha yaxşı anlamağa kömək edə bilər.