Lavrov: Bəzi paytaxtlarda Ukrayna münaqişəsindən yorğunluq hiss edilir- ÖZƏL

Olaylar.az xəbər verir ki, Rusiya Xarici İşlər Naziri Sergey Lavrov bəyan edib ki, Ukrayna münaqişəsi ilə bağlı bəzi paytaxtlarda yorğunluq müşahidə olunur.

Lavrov bu barədə ABŞ jurnalisti Taker Karlsona verdiyi müsahibəsində bildirib. Onun sözlərinə görə, Vaşinqton bu məsələdə Avropaya daha çox məsuliyyət yükləyib, özü isə daha vacib işlərə fokuslanmaq istəyir:
"Aydındır ki, bəzi paytaxtlarda yorğunluq var. ABŞ-ın bu məsələni Avropalılara buraxıb digər mühüm məsələlərə yönəlmək istədiyi barədə müzakirələr aparılır."

Nazir həmçinin qeyd edib ki, Rusiya konkret addımlara əsasən nəticə çıxaracaq. Bununla yanaşı, o, Bayden administrasiyasının vəziyyəti keçmiş prezident Donald Trampın üzərinə buraxmağa çalışdığını vurğulayıb.

Lavrov 2022-ci ildə İstanbulda sülh danışıqlarının uğursuzluğuna da toxunub. Onun sözlərinə görə, bu prosesin dayandırılmasında Böyük Britaniyanın keçmiş baş naziri Boris Consonun davranışı mühüm rol oynayıb. Lavrov qeyd edib ki, Consonun qərarları ya qısa müddətli istəklərdən, ya da uzunmüddətli strategiyadan qaynaqlana bilərdi.

Nazir həmçinin Buxada baş verən insidentə diqqət çəkib. O, bu hadisəni Qərb ölkələrinin Kiyev rejimi ilə birgə təşkil etdiyi "provokasiya" adlandırıb.

Taker Karlsonla müsahibə zamanı Lavrov bu və digər mühüm məsələlərə toxunub. Sözügedən müsahibə artıq internetdə yayımlanıb.