Berbok Avropa əhalisinin sayını yanlış təqdim etdi – ÖZƏL

Olaylar.az xəbər verir ki, Almaniyanın xarici işlər naziri Annalena Berbok Ukrayna ilə bağlı Rusiyanın xarici işlər naziri Sergey Lavrovun mövqeyini tənqid edərkən Avropa əhalisinin sayını səhvən 1,3 milyard nəfər olaraq təqdim edib.

"Özünüzü aldada bilərsiniz, amma bütün dünyanı aldada bilməzsiniz. Siz bizi - Avropadakı 1,3 milyard insanı da aldada bilməzsiniz," - deyə Almaniyalı siyasətçi bildirib.

Sonradan Almaniya Xarici İşlər Nazirliyi X sosial platformasında Berbokun ifadəsini düzəldərək "Avropa" sözünü "ATƏT regionu" ilə əvəz edib.

BMT-nin məlumatına görə, Avropanın əhalisi təxminən 750 milyon nəfərdir. 1,3 milyard rəqəmi isə inkişaf etmiş ölkələri - Avropa ilə yanaşı Şimali Amerika, Avstraliya, Yeni Zelandiya və Yaponiyanı da əhatə edir.

Berbok Cənubi Afrika Respublikasına səfəri zamanı çıxışı ingilis dilində edib və çıxışı zamanı sözləri qarışdırıb. Belə ki, "mayak" (beacon) yerinə "donuz əti" (bacon) ifadəsini işlədərək, "Cənubi Afrikanın azadlığa gedən yolu ümumdünya üçün donuz əti ümididir" deyə qəribə bir cümlə qurub.

Bu hadisələr Lavrovun daha əvvəl Takker Karlsona verdiyi müsahibədə Avropalıların onunla qarşılaşdığı anlardakı davranışlarını təsvir etməsindən sonra baş verib. Lavrov Avropa İttifaqı rəsmilərinin onu gördükləri zaman qaçdıqlarını, sonuncu belə hadisənin "Böyük İyirmilik" sammitində baş verdiyini qeyd edib.