Rumıniya NATO ilə bağlı qeyri-müəyyənlik içindədir – ÖZƏL

Rumıniyada qarşıdan gələn bazar günü keçiriləcək prezident seçkiləri NATO üçün çətin vəziyyət yaradıb. 

Olaylar.az xəbər verir ki, bu haqda Politico yazıb. Məlumata görə, NATO-ya skeptik yanaşan və Rusiya ilə yaxın münasibətləri dəstəkləyən namizəd Kelin Corceskunun qalib gəlmə ehtimalı alyansda narahatlıq doğurur.

19 milyon əhalisi olan Rumıniya artıq iki onillikdir ki, NATO üzvüdür. Ölkə Ukrayna ilə sərhədlənir, Kiyevə silah və sursat göndərir, həmçinin Devəselu bazasında ABŞ-ın "Aegis Ashore" raketdən müdafiə sistemini yerləşdirir. Burada həm Rumıniya, həm də ABŞ hərbi qüvvələri mövcuddur. Eyni zamanda, ölkədə Avropanın ən böyük aviasiya bazalarından biri genişləndirilir.

Lakin Kelin Corcesku bu beynəlxalq əməkdaşlıqları tənqid edərək Devəseludakı raketləri "milli rüsvayçılıq" adlandırıb. O, Ukraynaya yardımların dayandırılmasını və daha balanslı xarici siyasət yürüdülməsini tələb edir:

"Mən nə NATO-dan, nə də Avropa İttifaqından çıxmaq istəyirəm. Amma milli maraqlarımıza uyğun siyasət aparmalıyıq. Başqa dövlətlərə hər şeyi qəbul etmək şərtilə baş əyməməliyik," - deyə o, keçən həftə bildirib.

Rumıniyada prezident xarici siyasətə, silahlı qüvvələrin baş komandanlığına və dövlət idarəçiliyinə cavabdehdir. Bu baxımdan, NATO-ya skeptik yanaşan bir şəxsin prezident seçilməsi alyans üçün çətinliklər yarada bilər. Corcesku, Macarıstanın baş naziri Viktor Orbanın siyasətini təkrarlamaq ehtimalından bəhs edir.

Bununla belə, Corcesku özünü "ilk növbədə prorumin" adlandırıb və həm Şərq, həm də Qərblə bərabərhüquqlu münasibətlər qurulmasının vacibliyini vurğulayıb.